نرملا سیتارمن نے پاکستان کو دی ’کلین چٹ‘ تو چدمبرم نے بنایا تنقید کا نشانہ

بی جے پی کے قومی اجلاس میں مرکزی وزیر سیتارمن نے بیان دیا تھا کہ 2014 میں برسراقتدار آنے کے بعد کوئی دہشت گردانہ حملہ نہیں ہوا۔ اس بیان پر چدمبرم نے 2016 کے پٹھان کوٹ اور اُری حملہ کی یاد دلائی۔

تصویر سوشل میڈیا
تصویر سوشل میڈیا
user

قومی آوازبیورو

کانگریس کے سینئر لیڈر پی چدمبرم نے مرکزی وزیر دفاع نرملا سیتا رمن کے دعووں کی بخیا ادھیڑ دی ہے۔ دراصل نرملا سیتا رمن کا کہنا ہے کہ سال 2014 میں بی جے پی کے اقتدار میں آنے کے بعد سے کوئی بڑا دہشت گردانہ حملہ نہیں ہوا۔ اس معاملے میں پی چدمبرم نے ٹوئٹ کرتے ہوئے لکھا ہے کہ ’’کیا وہ 2016 میں پٹھان کوٹ اور اُری میں ہوئے حملوں میں پاکستان کو کلین چٹ دے رہی ہیں؟‘‘ سابق مرکزی وزیر مالیات پی چدمبرم نے مزید لکھا ہے کہ ’’وزیر دفاع نے لکھا ہے کہ 2014 کے بعد سے پاکستان نے کوئی دہشت گردانہ حملہ نہیں کیا ہے؟ کیا وزیر دفاع ہندوستان کا نقشہ اٹھا کر بتا سکتی ہیں کہ پٹھان کوٹ اور اُری کہاں ہیں؟‘‘

قابل ذکر ہے کہ بی جے پی کے قومی اجلاس کے دوسرے دن یعنی ہفتہ کے روز سیتارمن نے دعویٰ کیا تھا کہ 2014 کے بعد سے کوئی بڑا دہشت گردانہ حملہ نہیں ہوا۔ انھوں نے کہا تھا کہ ’’ملک میں تباہی مچانے کی سبھی کوششوں کو سرحد پر ہی ختم کر دیا گیا ہے اور اس حکومت نے یقینی بنایا کہ دہشت گردوں کو امن ختم کرنے کا کوئی موقع نہ دیا جائے۔‘‘

واضح رہے کہ پٹھان کوٹ فضائیہ اڈہ پر حملہ 2 جنوری 2016 کو ہوا تھا۔ اس معاملے میں 7 جوان شہید ہوئے تھے۔ وہیں اُری حملہ بھی اسی سال 18 ستمبر کو اس وقت ہوا تھا جب بھاری اسلحوں سے لیس چار دہشت گردوں نے جموں و کشمیر کے شہر میں ہندوستانی فوج کے ہیڈ کوارٹر پر حملہ کیا تھا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔