کورونا وبا کے درمیان ایمس کی نرس یونین نے ہڑتال کا کیا اعلان، اسپتال انتظامیہ پریشان!

چھٹے پے کمیشن سمیت کئی مطالبات کو لے کر دہلی واقع آل انڈیا انسٹی ٹیوٹ آف میڈیکل سائنسز (ایمس) کی نرس یونین غیر معینہ مدت کی ہڑتال پر چلی گئی ہے۔ نرس یونین نے کہا ہے کہ جب تک ان کے مطالبات مانے نہیں جائیں گے، اس وقت تک ہڑتال جاری رہے گی۔ اس درمیان ایمس احاطہ میں نرسیں جمع ہوئیں اور آئندہ کے منصوبوں پر تبادلہ خیال کیا۔

میڈیا ذرائع سے موصول ہو رہی خبروں کے مطابق نرس یونین کی ہڑتال کی خبر ملنے کے بعد ایمس کے ڈائریکٹر ڈاکٹر رندیپ گلیریا نے اسے افسوسناک قرار دیا۔ خبر رساں ادارہ اے این آئی کے مطابق ڈاکٹر گلیریا کا کہنا ہے کہ کورونا وبا کے اس دور میں سچے نرسنگ اسٹاف ہڑتال نہیں کر سکتے۔ انھوں نے اس طرح کی ہڑتال کو ختم کرنے کی اپیل بھی کی۔

فی الحال ڈاکٹر گلیریا کی اپیل کا کوئی اثر نرس یونین کی ہڑتال پر پڑتا ہوا نظر نہیں آ رہا ہے، کیونکہ یونین نے اپنی ہڑتال جاری رکھی ہوئی ہے۔ ایمس کے ڈائریکٹر نے نرسوں کے مطالبات کے تعلق سے بتایا کہ ’’نرس یونین نے ایمس انتظامیہ کے سامنے 23 مطالبات رکھے اور ان کے تقریبا تمام مطالبات پورے کردیئے گئے ہیں۔ یونین ایک مطالبے کو منوانے کے لئے بضد ہے اوروہ ہے 6 سی پی سی میں شروعاتی تنخواہ طے کرنے میں مبینہ بے ضابطگی۔ فی الحال ایمس میں 7 سی پی سی لاگو ہے۔ اس معاملے میں نرس یونین کے ساتھ کئی میٹنگیں ہوچکی ہیں ۔ انہوں نے کہا کہ یہ نا انصافی ہو گی کہ جب ملک کورونا کے خلاف جنگ لڑ رہا ہے اور لوگ اپنے مریضوں کی جانوں کے لئے دعا مانگ رہے ہیں تو بدقسمتی ہے کہ نرس یونین نے ایسے وقت میں ہڑتال کا اعلان کیا ہے۔‘‘