پرتاپ گڑھ: 17 امیدواروں کے کاغذات نامزدگی خارج، شیوپال یادو پریشان

پرتاپ گڑھ: اتر پردیش میں 39 پرتاپ گڑھ پارلیمانی حلقہ میں انتخاب کے لیے کاغذات نامزدگی کی جانچ کے بعد ملائم یادو کے بھائی شیوپال یادو کی پارٹی پرگتی شیل سماج وادی پارٹی سمیت 17 امیدواروں کے کاغذات نامزدگی خارج کر دیے گئے۔ شیوپال یادو کے لیے یہ پریشانی والی بات ہے کیونکہ انھوں نے کچھ سیٹوں سے ہے اپنے امیدوار کھڑے کیے ہیں اور اگر ان میں سے بھی امیدواروں کا پرچہ نامزدگی خارج ہو گیا تو یہ نیک فال نہیں۔ اس سلسلے میں ایڈیشنل ضلع اطلاعات افسر سویتا یادو نے بتایا کہ اہم سیاسی پارٹیوں سمیت کل 25 پارٹیوں کی جانب سے کاغذات نامزدگی داخل کیا گیا تھا جن میں سے 8 پارٹی امیدواروں کے کاغذات درست پائے گئے۔

سویتا یادو نے بتایا کہ بدھ کے روز کاغذات کی جانچ ہوئی جس کے بعد بی ایس پی سے اشوک ترپاٹھی، کانگریس سے رتنا سنگھ ، بی جے پی سے سنگم لال، جن ستہ دل سے اکشے پرتاپ سنگھ، سروودیہ بھارت پارٹی سے محمد ارشاد، مولک ادھیکار پارٹی سے رام بہادر شرما، ایس یو ایس آئی سے شیش ناتھ اور آزاد امیدوار بجرنگی سمیت آٹھ لوگوں کے کاغذات درست تھے جب کہ پرگتی شیل سماج وادی پارٹی امیدوار جئے سنگھ سمیت 17 امیدواروں کے کاغذات میں خامی تھی جس کے سبب اسے خارج کر دیا گیا۔