یوپی میں نئے ارکان اسمبلی نے حلف لیا، جیل میں قید اعظم خان اور ناہید حسن حلف برداری سے محروم

لکھنؤ: یوپی اسمبلی میں نومنتخب ارکان کو حلف دلانے کا سلسلہ پیر کے روز سے شروع ہوا اور منگل کے روز اسمبلی کے 42 نئے ارکان نے ایوان کی رکنیت کا حلف لیا۔ اسمبلی ہال میں منعقدہ حلف برداری تقریب کے دوران گورنر کی جانب سے نامزد سینئر رکن سریش کھنہ نے ایوان کے دیگر ارکان کو حلف دلایا۔ رام پور کے رکن اسمبلی اعظم خان اور کیرانہ سے رکن اسمبلی ناہید حسن جیل میں قید ہونے کی وجہ سے حلف نہیں لے پائے۔

خیال رہے کہ اعظم خان اس سے پہلے رام پور سے رکن پارلیمنٹ تھے اور انہوں نے حال ہی میں لوک سبھا رکنیت سے استعفی دیا ہے۔ اعظم خان اس وقت سیتاپور جیل میں قید ہیں۔ حلف برداری تقریب کے دوران حزب اقتدار کی جانب سے جہاں ’جے شری رام‘، ’بھارت ماتا کی جے‘ اور ’بندے ماترم‘ جیسے نعرے لگائے جا رہے تھے تو سماجوادی پارٹی کی جانب سے ’جے بھیم‘، ’جے سماجواد‘ اور ’جے جوان، جے کسان‘ کے نعرے بلند کئے گئے۔

اس دوران وزیر اعلیٰ یوگی آدتیہ ناتھ نے تمام ارکان اسمبلی کو مبارک باد پیش کی اور امید ظاہر کی کہ تمام ارکان ریاست کی ترقی کے لئے یکجا ہو کر کام کریں گے۔ اس مرتبہ ایوان میں یوگی آدتیہ ناتھ اکیلے ہی ایسے رکن نہیں ہیں جو زعفرانی لباس پہنتے ہیں بلکہ حلف لینے والوں میں بجنور کی چاند پور سیٹ سے منتخب سماجوادی پارٹی کے سوامی اومویش، پیلی بھیت کی برکھیڑا سیٹ سے جیتنے والے بی جے پی کے جے درتھ عرف سوامی پروکتانند اور کپلوستو سے بی جے پی کے رکن اسملبی شیامدھنی راہی بھی زعفرانی دستار باندھے اور اسی رنگ کا دھوتی کرتا پہنے ہوئے نظر آئے۔

خیال رہے کہ پہلے دن کل 348 ارکان نے حلف لیا تھا۔ پیر کے روز سب سے پہلے وزیر اعلیٰ یوگی آدتیہ ناتھ نے رکن اسمبلی کے طور پر حلف لیا، اس کے بعد قائد حزب اختلاف اکھلیش یادو نے حلف لیا۔