اورنگ آباد: خوفناک آتشزدگی میں کئی گھر خاکستر، تین بچوں کی موت

اورنگ آباد: بہار کے اورنگ آباد ضلع میں اوبرا بلاک کے نونیر گاﺅں میں آج دو پہر خوفناک آگ لگ جانے سے قریب بارہ گھر جل کر راکھ ہوگئے اور اس واقعے میں تین بچے کی جھلس کر موت ہوگئی۔ داؤد نگر کی سب ڈویژنل افسر کماری انوپما سنگھ نے منگل کو نونیر گاؤں میں لگی آگ کی تصدیق کرتے ہوئے بتایاکہ اس واقعے میں کئی گھر جل کر راکھ ہوگئے وہیں تین بچوں کی جھلس کر موت ہوگئی ہے۔

انوپما سنگھ نے مزید بتایا کہ آگ پر قابو پالیا گیا ہے اور ابھی راحت اور بچاﺅ کا کام چل رہا ہے۔ آگ لگنے کی وجوہات کا فی الحال پتہ نہیں چل سکا ہے۔ واقعہ کی اطلاع ملتے ہی اوبرا کے سرکل افسر اور تھانہ صدر موقع پر پہنچ گئے ہیں اور ضروری تفتیش کر رہے ہیں۔ اس میں ایک بچے کی لاش برآمد کرلی گئی ہے اور دو دیگر کی لاش باہر نکالنے کی کوشش کی جا رہی ہے۔