اہم خبریں: ای ڈی کی دھمکی کے سبب میتھون بی جے پی میں شامل ہوئے... سوگت رائے

ٹی ایم سی کے سینئر رہنما سوگت رائے نے کہا کہ میتھن چکرورتی کو بی جے پی کی طرف سے ای ڈی کی دھمکیاں موصول ہوئی تھیں، جس کے بعد انہوں نے راجیہ سبھا چھوڑ دی اور اب بی جے پی میں شامل ہوگئے ہیں۔ انہوں نے کہا کہ اب ان کی نہ تو کوئی ساکھ ہے اور نہ ہی لوگوں میں کوئی اثر و رسوخ ہے۔

حاجی پور: بہار میں ویشالی ضلع کے پاتے پور تھانہ علاقہ سے پولیس نے پک اپ وین پر لدی 26 کارٹن انگریزی شراب کے ساتھ دو اسمگلروں کو گرفتار کرلیا۔ پولیس ذرائع نے اتوار کو یہاں بتایا کہ اطلاع کی بنیاد پر بر ڈی ہاتو کری گاﺅں واقع ایک ٹھکانے پر چھاپے ماری کی گئی۔ اس دوران ایک پک اپ وین پر لدی 26 کارٹن ہریانہ میں تیار انگریزی شراب برآمد کی گئی۔ ذرائع نے بتایا کہ موقع سے شراب اسمگلر سبھاش کمار اور اویناش کمار کو گرفتار کیا گیا ہے۔ پولیس ان سے تفتیش کر رہی ہے۔

میرٹھ کے کیلی میں منعقدہ کسان مہاپنچایت سے خطاب کرتے ہویے پرینکا گاندھی نے متکبر حکومت کے ظلم و ستم کو برداشت کرنے والے کسان بھائیوں کے حق میں لڑتے رہنے کی بات دوہرائی۔

پرینکا گاندھی نے کہا، ’’بھائی راہل نے پارلیمنٹ میں کسانوں کی موت کا ایشو اٹھایا لیکن کسانوں کی موت پر سبھی خاموش رہے۔ پارلیمنٹ میں حزب اقتدار سے کوئی کسانوں کے حق میں کھڑا نہیں ہوا۔ کسانوں کی بے عزتی کی گئی۔ آندولن جیوی اور پرجیوی کہہ کر بے عزتی ہوئی۔‘‘

میرٹھ کے کیلی گاؤں میں منعقدہ کسان مہا پنچایت میں پرینکا گاندھی ٹریکٹر پر سوار ہو کر پہنچیں ہیں۔ مہا پنچایت میں بڑی تعداد میں کسان شامل ہیں، جو بے صبری سے ان کے خطاب کرنے کا انتظار کر رہے ہیں۔

کانگریس لیڈر پرینکا گاندھی کو کسان پنچایت میں سننے کے لیے میرٹھ کے کیلی گاؤں میں ایک بڑا جم غفیر موجود ہے۔ مہاپنچایت کچھ ہی دیر میں شروع ہونے جا رہی ہے۔

کانگریس کی جنرل سکریٹری پرینکا گاندھی آج میرٹھ کے دورے پر ہیں، جہاں وہ کسان پنچایت سے خطاب کریں گی۔ اطلاعات کے مطابق پرینکا گاندھی میرٹھ کے لیے روانہ ہو چکی ہیں اور راستہ میں لوگوں کی جانب سے ان کا شاندار استقبال کیا جا رہا ہے۔

ہندوستان میں ایک مرتبہ پھر 18 ہزار سے زیادہ کورونا کے کیسز رپورٹ ہویے ہیں اور اس کے مقابلہ شفایابی حاصل کرنے والوں کی تعداد کم ہے۔ مرکزی وزارت صحت کے مطابق ہندوستان میں گزشتہ 24 گھنٹوں کے دوران کورونا کے 18711 کیسز درج کیے گیے جبکہ 100 افراد لقمہ اجل بن گیے۔ اسی اثنا میں 14392 افراد نے شفایابی حاصل کر لی۔

واشنگٹن: عالمی وبا کورونا وائرس سے دنیا بھر میں گزشتہ 24 گھنٹوں کے دوران تین لاکھ سے زیادہ لوگ متاثر ہوئے ہیں اس کے ساتھ ہی متاثرین کی تعداد بڑھ کر 116383381 ہوگئی۔

امریکہ کی جان ہاپکنز یونیورسٹی کے سائنس و ٹکنالوجی کے مرکز (سی ایس ایس ای) کی جانب سے جاری اعداد و شمار کے مطابق دنیا کے 192 ممالک اور علاقوں میں اس دوران پانچ ہزار سے زیادہ لوگوں کی کورونا سے موت ہوئی۔ دنیا میں اب تک 25 لاکھ 85 ہزار سے زیادہ لوگوں کی اس وبا سے موت ہوچکی ہیں۔

دنیا میں امریکہ، ہندوستان، برازیل اور روس کورونا وبا سے سب سے زیادہ متاثر ہیں اور ان سبھی ممالک میں وسیع پیمانے پر کورونا کا ٹیکے لگائے جا رہے ہیں۔