کمل ناتھ کا کمال! وزیر اعلیٰ بنتے ہی کسانوں کا قرض کیا معاف

کانگریس صدر راہل گاندھی نے ٹوئٹ کرتے ہوئے کہا ہے کہ ابھی ایک ریاست کے کسانوں کا قرض معاف کیا گیا ہے اور جلد ہی بقیہ دو ریاستوں کے کسانوں کا بھی قرض معاف کیا جائے گا۔

تصویر سوشل میڈیا
تصویر سوشل میڈیا
user

قومی آوازبیورو

مدھیہ پردیش کے نئے وزیر اعلیٰ کمل ناتھ نے ذمہ داری سنبھالتے ہی کسانوں سے کیا وعدہ پورا کر دیا ہے۔ انھوں نے ریاست کے کسانوں کی تکلیف کو دور کرنے یعنی قرض معافی کا جو وعدہ انتخابی منشور میں کیا تھا، اس کو پورا کرنے میں ایک دن کا بھی وقت نہیں لگایا۔ کمل ناتھ نے حلف برداری کے کچھ ہی گھنٹے کے اندر قرض معافی کی فائل پر دستخط کر دیئے اور اس حکم کے ساتھ ہی کسانوں کو سرکاری اور کوآپریٹو بینکوں کے ذریعہ دیا گیا 2 لاکھ روپے تک کا قلیل مدتی فصل قرض معاف ہو جائے گا۔

کمل ناتھ کی اس فوری کارروائی کے بعد کانگریس کے آفیشیل ٹوئٹر ہینڈل سے ایک پوسٹ کی گئی ہے جس میں لکھا گیا ہے کہ ’’اسے کہتے ہیں وعدہ نبھانا۔ کانگریس حکومت کو کسانوں سے کیا وعدہ پورا کرنے میں ایک دن بھی نہیں لگا۔‘‘ کانگریس کے قومی صدر راہل گاندھی نے بھی کمل ناتھ کے اس قدم کے بعد ایک ٹوئٹ کیا ہے جس میں انھوں نے لکھا ہے کہ ’’ابھی ایک ریاست میں قرض معافی کا فیصلہ ہوا ہے اور بہت جلد دو دیگر ریاستوں میں بھی کسانوں کا قرض معاف کیا جائے گا۔‘‘

قابل ذکر ہے کہ کمل ناتھ کے اس فیصلہ کے بعد 40 لاکھ کسانوں کو فائدہ ہوگا۔ امید ظاہر کی جا رہی ہے کہ بے روزگاروں کو مہنگائی بھتہ دینے کا اعلان بھی کمل ناتھ بہت جلد کریں گے اور خصوصی ذرائع سے موصولہ اطلاعات کے مطابق اس کا خاکہ بھی تیار ہو چکا ہے۔ پہلی بار مدھیہ پردیش کا وزیر اعلیٰ بننے والے کمل ناتھ کے ذریعہ پہلی ہی بال پر لگائے گئے اس سکسر نے ریاست کے کسانوں میں ایک نیا جوش بھر دیا ہے۔

کمل ناتھ کا کمال! وزیر اعلیٰ بنتے ہی کسانوں کا قرض کیا معاف
Published: 17 Dec 2018, 7:05 PM