ملک بھر میں ڈاکٹروں کا احتجاج جاری، 17 جون کو ملک گیر ہڑتال کا اعلان

بنگال کے ڈاکٹروں کی حمایت میں ملک بھر کے ڈاکٹروں کا احتجاجی مظاہرہ آج بھی جاری رہے گا۔ اس درمیان آئی ایم اے نے تین دنوں کے ملک گیر احتجاجی مظاہرہ کے ساتھ 17 جون کو ملک گیر ہڑتال کا اعلان کیا ہے۔

تصویر سوشل میڈیا
تصویر سوشل میڈیا
user

قومی آوازبیورو

مغربی بنگال میں ڈاکٹروں اور ریاستی حکومت کے درمیان رسہ کشی اب بھی جاری ہے۔ وہاں کے ڈاکٹر اب بھی احتجاجی مظاہرے کر رہے ہیں۔ تازہ ترین خبروں کے مطابق ملک میں ڈاکٹروں کی سرکردہ تنظیم آئی ایم اے یعنی انڈین میڈیکل ایسو سی ایشن نے انٹرنس اور ڈاکٹروں کے خلاف تشدد پر کنٹرول کے لیے ایک مرکزی قانون بنانے کا مطالبہ کرتے ہوئے کہا کہ اس قانون کی خلاف ورزی کرنے والوں کو سات سال کی سزا ہونی چاہیے۔

آئی ایم اے نے اپنے ایک بیان میں کہا ہے کہ جمعہ سے شروع ہوا احتجاجی مظاہرہ ہفتہ اور اتوار کو بھی جاری رہے گا۔ اس کے پیش نظر ڈاکٹر سیاہ رنگ کے بِلّے لگائیں گے اور دھرنا دینے کے علاوہ امن مارچ بھی نکالیں گے۔ آئی ایم اے کے جنرل سکریٹری آر وی اسوکن کا کہنا ہے کہ آئی ایم اے ’این آر ایس میڈیکل کالج‘ میں پرتشدد بھیڑ کا شکار بنے ڈاکٹر پریباہا مکھرجی کے تئیں ہوئے سلوک کی مذمت کرتی ہے۔

آئی ایم اے نے پیر کو سبھی اسپتالوں اور صحت مراکز میں غیر ضروری خدمات کو قومی سطح پر روک کا اعلان کیا ہے۔ صبح 6 بجے سے او پی ڈی خدمات بند کر دی جائیں گی اور اس دوران ایمرجنسی خدمات کم کرتی رہیں گی۔

10 جون کو مغربی بنگال میں کولکاتا کے نیل رتن سرکار میڈیکل کالج میں علاج کے دوران ایک شخص کی موت کے بعد اس معاملے نے طول پکڑا تھا۔ موت سے ناراض اہل خانہ نے ڈاکٹروں کو نازیبا الفاظ کہے تھے۔ جس کے بعد ڈاکٹروں نے معافی مانگنے کو کہا تھا لیکن بعد میں معاملہ گرما گیا اور کچھ ہی دیر میں بھیڑ نے اسپتال پر ہتھیاروں سمیت حملہ کر دیا۔ اس حملے میں دو جونیئر ڈاکٹر سنگین طور پر زخمی ہو گئے تھے اور کئی دیگر ڈاکٹروں کو بھی چوٹ آئی تھی جس کے بعد جونیئر ڈاکٹر ہڑتال پر چلے گئے تھے۔

میڈیا رپورٹ کے مطابق دہلی کے جن اسپتالوں کے ڈاکٹر ہڑتال پر شامل رہیں گے۔، ان میں ایمس، صفدر جنگ اسپتال، بابا صاحب امبیڈکر میڈیکل کالج اینڈ ہاسپیٹل، ہندو راؤ اسپتال، بی ایم ایچ دہلی، دین دیال اپادھیائے، سنجے گاندھی میموریل اسپتال، لیڈی ہارڈنگ میڈیکل کالج اینڈ ایسو سی ایٹڈ اسپتال، انسٹی ٹیوٹ آف ہیومن بیہیویر اینڈ الائیڈ سائنسز (آئی ایچ بی اے ایس)، شری دادا دیو ماتری ایوم ششو چکتسالیہ، ناردرن ریلوے سنٹرل ہاسپیٹل، ای ایس آئی سی ہاسپیٹل، چچا نہرو بال چکتسالیہ، گرو تیگ بہادر ہاسپیٹل اور گرو گووند سنگھ ہاسپیٹل سمیت دوسرے اسپتال شامل ہیں۔