آئی سی ایم آر چیف بلرام بھارگو بھی ہوئے کورونا پازیٹو، دہلی ایمس میں داخل

انڈین کونسل آف میڈیکل ریسرچ (آئی سی ایم آر) کے ڈائریکٹر جنرل بلرام بھارگو کووڈ-19 کی زد میں آ گئے ہیں۔ انھیں علاج کے لیے دہلی واقع ایمس میں داخل کرایا گیا ہے۔ اسپتال کے ایک ذرائع نے بتایا کہ 59 سالہ آئی سی ایم آر چیف کو 16 دسمبر کو ایمس کے ٹراما سنٹرل میں داخل کرایا گیا تھا۔

بلرام بھارگو ملک کے سرکردہ میڈیکل ریگولیٹری آئی سی ایم آر کے سربراہ ہیں جو ہندوستان میں کووڈ-19 مینجمنٹ میں سرگرم سرفہرست ادارہ ہے۔ آئی سی ایم آر کی دیکھ ریکھ میں ہی ملک میں کورونا ویکسین ڈیولپ کیا جا رہا ہے۔ واضح رہے کہ بلرام بھارگو آئی سی ایم آر کے ڈائریکٹر جنرل کی شکل میں تین سال کے ڈیپوٹیشن پر ہیں۔ مرکزی وزارت برائے صحت و خاندانی فلاح کے تحت ہیلتھ ریسرچ محکمہ کے سکریٹری بھی ہیں۔