حیدرآباد: کباڑ گودام میں خوفناک آتشزدگی، بہار سے تعلق رکھنے والے 11 مزدور ہلاک

حیدرآباد: تلنگانہ کی راجدھانی حیدرآباد میں اس وقت ایک خوفناک حادثہ پیش آیا جب یہاں کے بویا گوڈا علاقہ میں کباڑ کے گودام میں آگ گئی۔ خوفناک آگ کی زد میں آنے والے 11 افراد زندہ جل کر ہلاک ہو گئے۔ مرنے والے تمام افراد کا تعلق بہار سے ہے اور وہ یہاں کباڑ کے گودام میں کام کرتے تھے۔ ابتدائی تفتیش میں آگ لگنے کی وجہ شارٹ سرکٹ قرار دی جا رہی ہے۔ تاہم پولیس نے تفتیش شروع کر دی ہے۔

حیدرآباد کے ڈی سی پی سینٹرل زون نے بتایا کہ تمام 11 لاشوں کو نکال لیا گیا ہے۔ لاشوں کا پوسٹ مارٹم کرنے کے بعد مزید کارروائی کی جائے گی۔ آگ پر اب قابو پا لیا گیا ہے۔ خبر رساں ایجنسی اے این آئی کے مطابق گاندھی نگر کے ایس ایچ او موہن راؤ نے بتایا کہ گودام میں 12 لوگ موجود تھے، جن میں سے 11 کی موت ہو گئی اور صرف ایک ہی زندہ بچ پایا۔ ڈی آر ایف (ڈیزاسٹر ریسپانس فورس) بچاؤ کے کام میں مصروف ہے۔

تلنگانہ کے وزیر اعلی کے چندر شیکھر راؤ نے آتشزدگی کے واقعہ میں بہار کے مزدوروں کی موت پر افسوس کا اظہار کیا ہے۔ انہوں نے مرنے والوں کے لواحقین کو پانچ پانچ لاکھ روپے معاوضہ دینے کا بھی اعلان کیا ہے۔ نیز، مزدوروں کی لاشوں کو بہار بھیجنے کے انتظامات کرنے کا حکم صادر کیا گیا ہے۔ لاشیں بری طرح جھلس چکی ہیں، ایسی صورت حال میں ان کی شناخت کے لئے ڈی این اے ٹیسٹ کرایا جائے گا۔