راوت نے معافی کے طور پر گرودوارہ میں لگائی جھاڑو، کیے جوتے صاف

آل انڈیا کانگریس کے جنرل سکریٹری اور اتراکھنڈ کانگریس کے سینیئر رہنما ہریش راوت نے معافی کے طور پر اوھم سنگھ نگر کے نانکمَتّا پہنچ کر گرودوارہ صاحب میں جمعہ کے روز جھاڑو لگائی اور جوتے صاف کیے۔ اس دوران انہوں نے معافی مانگی اور اپنے حریف بھارتیہ جنتا پارٹی (بی جے پی) کے رہنما پرحملے بھی کیے ۔

کانگریس کے پنجاب انچارج مسٹر راوت گزشتہ دنوں اس وقت تنازعہ میں آ گئے تھے جب انہوں نے پنجاب کانگریس کے رہنماؤں کا تقابل ’پنچ پیاروں‘ سے کر دیا تھا۔ اسی کے بعد اس معاملے میں طوفان آگیا ۔ سیاسی پارٹیوں نے اسے سکھ سماج کے جذبات کے خلاف قرار دے دیا تھا۔ کانگریس اور خود مسٹر راوت اس کے بعد زد میں آ گئے اور انہوں نے سوشل میڈیا کے ذریعے گرودوارہ صاحب میں معافی مانگے اور اپنے بیان پر افسوس کا اظہار کیا تھا۔

مسٹر راوت آج اتراکھنڈ ریاست تحریک کے شہیدوں کی دھرتی کھٹیمہ پہنچے اور یہاں سے انہوں نے بی جے پی حکومت کے خلاف ’پریورتن یاترا‘ کا آغاز کیا۔ یہاں سے وہ براہ راست نانکمَتّا گرودوارہ صاحب پہنچے اور انہوں نے یہاں جھاڑو لگائی اور جوتے صاف کیے۔ ساتھ ہی ماتھاٹیک کر معافی بھی مانگی۔