جمعیۃ علما ہند کے جنرل سکریٹری مولانا محمود مدنی نےاستعفی کیوں دیا
مولانا محمود مدنی نے جو استعفی جمعیۃ علما ہند کے صدر قاری منصور پوری کو ارسال کیا ہے اس میں لکھا ہے کہ وہ ذاتی وجوہات کی بنا پر استعفی پیش کر رہے ہیں۔
جمعیۃ علما ہند کے جنرل سکریٹری محمود مدنی نے اپنے عہدے سے استعفی دے دیا ہے۔ انہوں نے اپنا استعفی تنظیم کے قومی صدر قاری عثمان منصور پوری کو بھیج دیا ہے۔ استعفی دینے کی وجہ کو لے کر لوگوں میں تذبذب کی صورت حال پائی جا رہی ہے کیونکہ کسی کو یہ سمجھ نہیں آ رہا ہے کہ اچانک وہ اس طرح سے مستعفی کیوں ہو گئے۔
مولانا محمود مدنی نے جو استعفی جمعیۃ علما ہند کے صدر قاری منصور پوری کو ارسال کیا ہے اس میں لکھا ہے کہ وہ ذاتی وجوہات کی بنا پر استعفی پیش کر رہے ہیں۔ جب محمود مدنی سے استعفی کے حوالہ سے وضاحت طلب کی گئی تو انہوں نے کہا کہ جو انہوں نے استعفی میں لکھا ہے وہی ان کی وضاحت ہے۔
کیا جمعیۃ علما ہند کے قومی صدر قاری منصور پوری ان کی بات نہیں مان رہے تھے یا پھر محمود مدنی کی دباؤ بنانے کی سیاست ہے جس کی وجہ سے انہوں نے یہ قدم اٹھایا۔ ایسے کئی سوالات ہیں جو اس وقت لوگوں کے ذہن میں گردش کر رہے ہیں۔
واضح رہے کہ جمعیۃ علما ہند میں جب سے شگاف پیدا ہوا ہے تو اس کے ایک دھڑے کو محمود مدنی اور دوسرے کو ان کے چچا ارشد مدنی چلا رہے تھے۔ اگر محمود مدنی کا استعفی تنظیم کو ایک کرنے کی سمت میں پیش کیا گیا ہے تو اس سے لوگوں کے درمیان ایک مثبت پیغام جائے گا۔ کوئی دوسری صورت اس تنظیم کو مضحکہ خیز صورت حال میں بھی پہنچا سکتی ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 16 Jan 2019, 10:10 PM