امبانی کی رہائش کے پاس دھماکہ خیز مواد رکھنے کے معاملہ میں سابق انکاؤنٹر اسپیشلسٹ پردیپ شرما گرفتار

ممبئی: قومی تفتیشی ایجنسی (این آئی اے) نے جمعرات کے روز ایس یو وی گاڑی اور کاروباری منسکھ ہیرین کے قتل کے معاملہ میں چل رہی جانچ کے سلسلہ میں سابق انکاؤنٹر اسپیشلسٹ پردیپ شرما کے گھر پر چھاپہ مارا اور انہیں گرفتار کر لیا۔ این آئی اے کی ٹیم نے ممبئی پولیس کے ہمراہ صبح کے وقت ان کے اندھیری واقع گھر پر چھاپہ مارا، تلاشی لی اور بعد میں پوچھ گچھ کے لئے انہیں حراست میں لے لیا گیا۔ بعد ازاں، دوپہر کے وقت پردیپ کو گرفتار کر لیا گیا۔ عدالت نے پردیپ اور دو دیگران کو 28 جون تک این آئی اے کی تحویل میں بھیج دیا ہے۔

این آئی اے نے یہ کارروائی 25 فروری کو صنعت کار مکیش امبانی کی رہائش ’انٹیلیا‘ کے نزدیک دھماکہ خیز مواد اور دھمکی آمیز خط برآمدگی کے ساتھ ایس یو وی گاڑی سے متعلق سنسنی خیز معاملہ میں کی گئی ہے۔ اس کے فوری بعد پولیس نے 5 مارچ کو تھانے سے ایس یو پی مالک کی لاش برآمد کی۔ دنوں معاملوں کے بعد بڑے پیمانے پر سیاسی تنازعہ شروع ہو گیا تھا۔

ایک سابق سینئر پولیس انسپکٹر اور بعد میں شیو سینا لیڈر بننے والے ایک شخص سے این آئی اے نے گزشتہ اپریل میں انہیں دو معاملوں کے حوالہ سے پوچھ گچھ کی تھی۔ گزشتہ ہفتہ این آئی اے نے دو دیگر افراد سنتوش آتمارام شیلار اور آنند پانڈورنگ جادھو کو گرفتار کیا تھا۔ دونوں کو ان دو معاملوں میں ان کے کردار کے لئے مالاڈ کے کورار گاؤں کی ایک جھونپڑ پٹی سے گرفتار کیا گیا تھا۔