اقتدار کے لئے بعض افراد ہندو- مسلمان میں تفرقہ پیدا کرنے کا کام کر رہے ہیں: ریونت ریڈی

حیدرآباد: تلنگانہ پردیش کانگریس کمیٹی کے صدر ریونت ریڈی نے کہا ہے کہ راجیو گاندھی نے غریبوں کی حالت زار جاننے کے لئے یاترا کی تھی۔ انہوں نے یاد دلایا کہ راجیو گاندھی نے کہا تھا کہ ہندو اور مسلمان ملک کی دو آنکھیں ہیں، جبکہ آج اقتدار کے لیے بعض افراد دونوں طبقات کے درمیان تفرقہ پیدا کرنے کا کام کر رہے ہیں۔

انہوں نے کہا کہ ’’راجیو گاندھی جی نے سرحدی معاملات کو حل کرنے کی کوشش اور ملک میں امن قائم کرنے کے لئے اپنی جان قربان کر دی تھی۔‘‘ تلنگانہ کانگریس کے صدر ریونت ریڈی نے حیدرآباد کی تاریخی یادگار چارمینار کے قریب سدبھاؤنا دیوس کے موقع پر منعقدہ تقریب سے خطاب کرتے ہوئے سابق وزیر اعظم اندرا گاندھی کو بھی یاد کیا۔ انہوں نے کہا کہ اندرا گاندھی نے بھی ملک کے اتحاد کے لیے اپنی جان بھی قربان کر دی۔

ریونت ریڈی نے کہا کہ ویرپا مویلی وہ شخص ہیں جنہوں نے کرناٹک کے وزیر اعلیٰ کی حیثیت سے اقلیتوں کے مسائل کو اجاگر کیا تھا۔ انہوں نے واضح کیا کہ متحدہ اے پی میں وائی ایس آر حکومت کے دوران مسلمانوں کو چار فیصد ریزرویشن دیا گیا تھا۔ راجیو گاندھی سدبھاؤنا یاترا میموریل کمیٹی کے زیر اہتمام منعقدہ اس تقریب میں پی سی سی کے سابق صدور اتم کمار ریڈی، پونالہ لکشمیا سمیت کئی سینئر لیڈروں نے شرکت کی۔