گوپال گنج میں مسجد کے پاس دھماکہ، علاقے میں دہشت

بہار میں گوپال گنج ضلع کے کٹیا نگر پنچایت علاقہ میں آج ایک مسجد کے قریب زوردار دھماکہ نے دہشت کا عالم پیدا کر دیا۔ دھماکہ مسجد کے پاس ایک کوڑے کے ڈھیر میں ہوا جس کے بعد علاقے میں افرا تفری پیدا ہو گئی۔ دھماکہ کی شدت کا اندازہ اسی بات سے لگایا جا سکتا ہے کہ جس جگہ دھماکہ ہوا وہاں تقریباً 3 فیٹ کا گڈھا بن گیا۔ مقامی لوگوں کے مطابق دھماکے کی آواز کئی سو کلومیٹر دور تک سنی گئی۔ اچھی بات یہ رہی کہ اس دھماکہ میں کسی جانی نقصان کی اطلاع نہیں ہے۔

دھماکہ کی خبر ملنے کے بعد پولیس جائے واقعہ پر پہنچ گئی اور معاملے کی تفتیش بھی شروع ہو گئی ہے۔ موصولہ اطلاعات کے مطابق کٹیا نگر پنچایت کے وارڈ نمبر 4 کے قریب موجود مسجد کے پاس یہ دھماکہ ہوا۔ مقامی وارڈ کونسلر سنتوش گپتا نے بتایا کہ دن میں مسجد کے کنارے کوڑے میں دھماکہ ہوا جس کی وجہ سے تیسری منزل تک کوڑا اِدھر اُدھر بکھر گیا تھا۔ دھماکے کی تیز آواز سے پورا علاقہ تھرتھرا گیا۔

جائے حادثہ کے قریب ہی رہنے والے ایک مقامی باشندہ محمد فریاد نے بتایا کہ انھوں نے مسجد کے پاس پڑے کچرے کو اکٹھا کر آس پاس کے علاقے کو صاف کر دیا تھا۔ صاف صفائی کے بعد ابھی ہاتھ پیر دھو رہے تھے تبھی تیز دھماکہ ہو گیا۔ دھماکے کی وجہ سے لوگ اپنے گھروں سے باہر نکل آئے۔

بہرحال، پولیس سپرنٹنڈنٹ آنند کمار نے بتایا کہ کٹیا پولیس کی ٹیم موقع پر پہنچ کر معاملے کی جانچ کر رہی ہے۔ انھوں نے مزید کہا کہ معاملے کی جانچ کے لیے ایف ایس ایل کی ٹیم بھیجی گئی ہے جو اس معاملے میں تفتیش کرے گی۔ دھماکہ کی اصل وجہ کیا ہے، اس کا پتہ جانچ کے بعد ہی چل پائے گا۔