سفارتخانوں نے اس مرتبہ سادگی سے منائی دیوالی، نہیں ہوا کوئی پروگرام!

ہندوستان میں اس بار دیوالی کا تہوار بہت احتیاط کے ساتھ منایا جا رہا ہے۔ کورونا انفیکشن سے بچنے کے مقصد سے اس بار ہندوستان میں موجود سفارتخانوں نے بھی دیوالی کے موقع پر کوئی پروگرام منعقد نہیں کیا۔

تصویر سوشل میڈیا
تصویر سوشل میڈیا
user

قومی آوازبیورو

ہندوستان ہی نہیں، پوری دنیا میں دیوالی کا تہوار دھوم دھام سے منایا جاتا ہے، لیکن اس مرتبہ کورونا کی وجہ سے کافی احتیاط کرتے ہوئے یہ تہوار منایا جا رہا ہے۔ ہندوستان میں موجود مختلف ممالک کے سفارتخانوں نے بھی لوگوں کی صرف مبارکبادیاں دیں، کسی بھی طرح کے پروگرام کے انعقاد سے پرہیز کیا۔

ہندوستان میں پیرو کے سفارتخانہ کی طرف سے جو پیغام شیئر کیا گیا ہے اس میں کہا گیا ہے کہ ’’ہم بڑی تقریب سے بچتے ہوئے، گھر میں قید ہیں۔ ہم نے جمعرات کو سفارتخانہ میں لوگوں کے ساتھ تحائف بانٹے، لیکن مجموعی طور پر ہمیں بہت زیادہ رابطہ سے بچنے کے لیے اسے ایک پائیدان نیچے لے جانا پڑا۔ پھر بھی ہم سبھی کے لیے دیوالی ہمیشہ ایک مبارک موقع ہوتا ہے۔‘‘ سفارتخانہ کی جانب سے مزید کہا گیا کہ ’’ہم جانتے ہیں کہ یہ ہندوستانیوں کے لیے سب سے محبوب تہوار ہے اور ہم آپ کی خوشی کو بانٹتے ہیں، اور سبھی ہندوستانی باشندوں کو دیوالی کی مبارکباد دیتے ہیں۔‘‘


ہندوستان میں جرمن سفارتخانہ کے سفیر والٹر جے لنڈنر نے بھی دیوالی کی مبارکباد دیتے ہوئے کہا کہ ’’کووڈ نے اس سال دیوالی کے تہوار کو منانے کا طریقہ بدل دیا ہے۔ نہ ہی کسی طرح کی کوئی پارٹی اور نہ ہی کسی سے میل ملاپ۔ لیکن روشنی کے تہوار کا جو مزہ امن اور خوشحالی کے ساتھ زندگی کو روشن کرنے کا پیغام ہے، وہ کسی سے اچھوتا نہیں رہا۔ آپ سبھی کو دیوالی مبارک۔‘‘

ہندوستان میں امریکی سفارتخانہ میں بھی اس سال دیوالی کے موقع پر کسی طرح کا کوئی جشن نہیں ہوا۔ حالانکہ گزشتہ سال دیوالی کے موقع پر امریکی سفارتخانہ نے اپنے آفیشیل ٹوئٹر اکاؤنٹ سے ایک ویڈیو شیئر کیا تھا، جس میں امریکی خواتین ایک ایک گانے پر رقص کرتی ہوئی دیکھی گئی تھیں۔ ویڈیو میں دیوالی کی مبارکبادیاں بھی دی گئی تھیں۔ کورونا وبا کی وجہ سے اس سال امریکی سفارتخانہ نے اپنے آفیشیل ٹوئٹر پیج سے ہندوستانی باشندوں کو دیوالی کی مبارکباد دی۔


ہندوستان میں آسٹریلیائی سفارتخانہ کے سفیر بیری او. فیریل نے بھی دیوالی کی سبھی کو نیک خواہشات پیش کی، اور ایک ویڈیو شیئر کیا جس میں دیوالی کو لے کر ایک پیغام دیا گیا ہے۔ اس پیغام میں کہا گیا ہے کہ ’’آسٹریلیا میں ہر 35 شہری میں سے ایک ہندوستانی شہری ہے۔ اس لیے ہمارے طبقات کے درمیان رشتہ اتنا مضبوط ہے کہ وہاں بھی دیوالی منائی جاتی ہے۔ آپ سبھی کو دیوالی کی نیک خواہشات۔ اس سال ہم سب کے لیے خاص چیلنج ہے، اس لیے اپنے دوستوں اور اہل خانہ کے ہمراہ پورے جوش اور احتیاط کے ساتھ تہوار منائیں۔‘‘

روسی سفارتخانہ میں بھی اس سال کسی طرح کا جشن نہیں منایا گیا۔ حالانکہ سفارتخانوں کی جانب سے کچھ دن پہلے ہی اپنے ملازمین کو تحائف ضرور پیش کیے گئے تھے، لیکن کورونا کے سبب یہاں کسی طرح کی کوئی تقریب منعقد نہیں کی گئی۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔