ای ڈی کے سوالات نہیں ہو رہے ختم، راہل گاندھی کو کل پھر بلایا گیا

کانگریس کے سابق صدر راہل گاندھی سے ای ڈی (انفورسمنٹ ڈائریکٹوریٹ) افسران کی پوچھ تاچھ دو دنوں سے جاری ہے، لیکن ان کے سوالات ہیں کہ ختم ہونے کا نام نہیں لے رہے ہیں۔ 13 جون سے لے کر اب تک تقریباً 18 گھنٹے راہل گاندھی سے پوچھ تاچھ ہو چکی ہے، اور آج ای ڈی نے ان سے کہا کہ وہ 15 جون کی صبح پھر سے اپنا بیان درج کرانے کے لیے ای ڈی دفتر پہنچیں۔ اس درمیان کانگریس کے سینئر لیڈران کافی ناراض ہیں اور ای ڈی کی اس کارروائی پر سخت تنقید بھی کر رہے ہیں۔ کانگریس کے کئی سینئر لیڈران کو الگ الگ پولیس اسٹیشن میں زیر حراست بھی رکھا گیا ہے اور ہنوز انھیں چھوڑے جانے کی کوئی خبر سامنے نہیں آئی ہے۔

میڈیا رپورٹس کے مطابق منگل کے روز جب تقریباً آٹھ گھنٹے کی پوچھ تاچھ ہو گئی تو راہل گاندھی نے ای ڈی افسران سے ناراضگی کا اظہار کرتے ہوئے کہا کہ انھیں جتنے بھی سوال پوچھنے ہیں، آج ہی پوچھ لیں اور بار بار بلا کر پریشان نہ کریں۔ انھوں نے افسران سے کہا کہ ’’اس سے ہمارے کارکنان بھی پریشان ہو رہے ہیں اور آپ باہر دیکھ ہی رہے ہیں کہ کیا چل رہا ہے۔‘‘

اس سے قبل راہل گاندھی کو دوسرے دن بھی پوچھ تاچھ کے لیے بلائے جانے پر کانگریس کے بڑے لیڈران اور کارکنان آج صبح سڑکوں پر کثیر تعداد میں اتر کر اپنی ناراضگی ظاہر کرتے نظر آئے۔ انھوں نے مرکزی حکومت اور ای ڈی کے خلاف ہنگامہ کیا اور راہل گاندھی کو پریشان کیے جانے پر اپنا احتجاج بھی ظاہر کیا۔ اس دوران پارٹی کے قومی ترجمان رندیپ سرجے والا کو سنگین چوٹیں آنے کی بھی خبریں سامنے آئی ہیں۔ قابل ذکر ہے کہ پیر کے روز کانگریس کے سینئر لیڈر پی چدمبرم کی پسلی میں فریکچر ہو گیا تھا۔ اس تعلق سے راہل گاندھی نے ناراضگی بھی ظاہر کی تھی۔