پاکستان میں زلزلہ: ہلاک شدگان کی تعداد 25 ہوئی، 300 سے زیادہ زخمی
منگل کے روز سہ پہر تقریباً 4.30 بجے آنے والے زلزلے کی شدت 5.8 ریکارڈ کی گئی۔ امریکی جیالوجیکل سروے کے مطابق زلزلے کا مرکز پی او کے کا شہر میرپور تھا اور اس کی گہرائی 10 کلومیٹر تھی۔
پاکستانی دارالحکومت اسلام آباد، پنجاب اور خیبرپختونخوا کے مختلف شہروں اور مقبوضہ کشمیر میں منگل کی سہ پہر آنے والے شدید زلزلہ کے نتیجے میں جاں بحق ہونے والوں کی تعداد 25 ہو گئی ہے، جبکہ 300 سے زیادہ افراد زخمی ہو ئے ہیں۔ جن خاندانوں میں ہلاکتیں ہوئیں ہیں وہاں ماتم ہے، راحت اور بچاؤ کا کام تاحال جاری ہے۔
منگل کے روز سہ پہر تقریباً 4.30 بجے (ہندوستانی وقت کے مطابق) آنے والے زلزلے کی شدت 5.8 ریکارڈ کی گئی۔ امریکی جیالوجیکل سروے کے مطابق زلزلے کا مرکز پی او کے (پاکستان مقبوضہ کشمیر) کا شہر میرپور تھا اور اس کی گہرائی 10 کلومیٹر تھی۔ زلزلے کے بعد مکانوں، دفاتر اور عمارتوں میں موجود لوگ کلمہ طیبہ کا ورد کرتے ہوئے باہر آ گئے تھے، اطلاعات کے مطابق زلزلے کا یہ دورانیہ 8 سے 10 سیکنڈ کا تھا۔
پی او کے میں واقع شہر میرپور میں اس زلزلے کے نتیجے میں سب سے زیادہ تباہی ہوئی ہے۔ میرپور کے ڈویژنل کمشنر چودھری محمد طیب اور ڈپٹی انسپکٹر جنرل آف پولس گل فراز خان نے 23 افراد کی ہلاکت کی تصدیق کی ہے، انہوں نے بتایا ہے کہ ان میں تین بچّے بھی شامل ہیں۔ ان میں دس افراد صرف ایک گاؤں جاتلاں میں جاں بحق ہوئے ہیں۔ انھوں نے مزید بتایا ہے کہ 300 زخمیوں میں 35 کی حالت تشویش ناک ہے۔تازہ اطلاعات کے مطابق ہلاکتوں کی تعداد 25 ہو گئی ہے۔
پاکستانی فوج کے ترجمان میجر جنرل آصف غفور نے ایک ٹوئٹ میں کہا ہے کہ ’’آرمی چیف جنرل قمر جاوید باجوہ نے پاکستان کے زیر انتظام کشمیر میں سول انتظامیہ کی معاونت اور زلزلہ زدہ علاقوں میں فوری طور پر امدادی کارروائیاں شروع کرنے کی ہدایت کی ہے۔ ‘‘ ترجمان کا کہنا ہے کہ فوجی اہلکار اور طبی امدادی ٹیمیں زلزلے سے متاثرہ علاقوں کی جانب روانہ کردی گئی ہیں۔
العربیہ ڈاٹ نیٹ کے مطابق میر پور کے ایک مقام پر عمارت گرنے سے 50 افراد کے زخمی ہونے کی اطلاع ہے ۔ تمام زخمیوں کو علاج و معالجہ کے لئے اسپتال منتقل کردیا گیا ہے۔ زلزلے کی شدت اتنی شدید تھی کہ اس کے باعث سڑکیں پھٹ گئیں جس کی وجہ سے متعدد گاڑیاں ان میں دھنس گئیں۔
کھاڑک کے علاقے میں زلزلے کے باعث دیوار گرنے سے 10 سالہ بچی جاں بحق ہوئی۔ میرپور میں زلزلے سے مسجد کے مینار گرگئے جس سے کئی افراد زخمی ہوگئے، جنہیں طبی امداد کے لیے مقامی اسپتال میں منتقل کردیا گیا۔ میرپور میں قریباً 10 سیکنڈ تک زلزلہ محسوس ہوا جبکہ کچھ مقامات پر بعد از زلزلہ جھٹکے محسوس کیے گئے ہیں۔
زلزلے کے بعد پی او کے انتظامیہ نے اسپتالوں میں ایمرجنسی نافذ کردی اور تمام زخمیوں کو بہتر طبی امداد فراہم کرنے کی ہدایت دی ہے۔ مختلف حادثات کی اطلاعات ملتے ہی امدادی ٹیمیں موقع پر پہنچیں اور مقامی افراد کی مدد سے زخمیوں کو اسپتال منتقل کیا۔
وزیراطلاعات پی او کے مشتاق منہاس کا کہنا ہے کہ زلزلے کے بعد ایمرجنسی نافذ کردی گئی ہے اور وزیراعظم پی او کے فاروق حیدر نے اپنا دورہ لاہور مختصر کردیا ہے اور وہ خود امدادی کارروائیوں کی نگرانی کر رہے ہیں۔
پاکستان کے وزیراعظم عمران خان نے ملک میں زلزلے سے ہونے والے نقصانات اور انسانی جانوں کے ضیاع پر گہرے دکھ اور افسوس کا اظہار کیا ہے۔ انھیں نیویارک میں پاکستان میں شدید زلزلے اور اس سے ہونے والے جانی اور مالی نقصان سے آگاہ کیا گیا۔ انھوں نے متعلقہ حکام کو متاثرین کو فوری طور پر ہر ممکن امداد مہیا کرنے کی ہدایت کی ہے۔
صدر مملکت ڈاکٹر عارف علوی نے بھی زلزے سے ہونے والے جانی اور مالی نقصان پر گہرے دکھ اور افسوس کا اظہار کیا ہے اور جاں بحق افراد کی مغفرت اور بلندی درجات کی دعا کی ہے۔ صدر مملکت نے متاثرہ خاندانوں سے اظہارِ یکجہتی کرتے ہوئے زخمیوں کی جلد صحت یابی کی دعا کی ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 25 Sep 2019, 4:10 PM