لاک ڈاؤن نےپیدا کی ایک نئی مصیبت، منشیات کے استعمال میں تشویشناک حد تک اضافہ

نیشنل کانفرنس نے وادی کشمیر میں منشیات کے استعمال کے پھیلاؤ خصوصاً لاک ڈاؤن کے دوران نوجوانوں میں تشویشناک حد تک اس وبا میں مبتلا ہونے پر تشویش کا اظہار کرتے ہوئے حکومت پر زور دیا ہے کہ تشہیر بازی اور زبانی جمع خرچ سے آگے بڑھ کر نئی نسل کو بچانے کے لئے ٹھوس اور کارگر اقدامات اٹھائے جائیں۔

پارٹی کے سینئر لیڈر اور اسمبلی کے سابق سپیکر مبارک گل نے اپنے ایک بیان میں کہا ہے کہ منشیات کے استعمال کی روک تھام کے لئے سب کو اپنا اپنا رول نبھانا ہوگا۔انہوں نے کہا: 'بدقسمتی سے ہمارے یہاں تباہ کن، صحت زرر ادویات اور نشہ آور چیزوں کے استعمال کا پھیلائو بڑھتا جا رہا ہے اور لاک ڈاؤن کے دوران اس صورتحال میں تشویشناک حد تک اضافہ ہو گیا ہے۔ پارکوں، کھنڈرات، قبرستانوں اور دیگر مقامات منشیات کے استعمال کے اڈے بن گئے ہیں'۔

مبارک گل نے کہا کہ حکومتی سطح پر اگرچہ منشیات کی فصلوں کو تباہ کرنے اور منشیات کا استعمال یا خرید و فروخت کرنے والوں کی گرفتاریاں عمل میں لانے جیسے اقدامات دیکھنے کو ملتے ہیں لیکن یہ اقدامات محض تصویر بازی تک ہی محدود ہوتے ہیں کیونکہ ایسی کارروائیوں سے زمینی سطح پر منشیات کے استعمال اور کاروبار میں کوئی بھی کمی نہیں آرہی ہے بلکہ یہ وبا ہر گزرتے دن کے ساتھ پھیلتی ہی جا رہی ہے۔

اُن کا کہنا تھا کہ ہر سال شاہراﺅں کے نزدیک منشیات کی کاشت کو تباہ کرنے کی تصویریں ذرائع ابلاغ میں دکھائی جاتی ہیں لیکن اندرونی علاقوں میں ہزاروں کنال اراضی پر پوست (خشخاش)، بھنگی اور دیگر ممنوعہ فصلوں کی کاشت بلا روک ٹوک جاری رہتی ہیں۔

انہوں نے حکومت اور قانون نافذ کرنے والے اداروں پر زور دیا کہ نئی نسل کو اس تباہی سے روکنے کے لئے ٹھوس اور کارگر اقدامات اٹھائے جائیں اور اس کے لئے خصوصی ٹیمیں تشکیل جائیں جو ہر روز منشیات کے کاروباریوں، پارکوں، قبرستانوں، کھنڈرات اور دیگر مقامات پر روزانہ بنیادوں پر چھاپہ مار کارروائیاں سلسلہ جاری رکھیں اور ساتھ ہی ایسی جگہوں پر سی سی ٹی وی کیمرے نصب کئے جائیں۔

مبارک گل نے انتظامیہ پر زور دیا کہ کورونا وائرس کے خلاف لڑائی منشیات کے خلاف جنگ میں آڑے نہیں آنی چاہئے اور ایسے تمام نیٹ ورکروں کا پردہ فاش کیا جانا چاہئے جو جموں و کشمیر کی نئی نسل کو منشیات کا عادی بنانے کا کام کررہی ہے۔انہوں نے والدین پر بھی زور دیا کہ اپنے بچوں کو اس منشیات کی لعنت میں مبتلا ہونے سے روکنے کے لئے اپنی ذمہ داریاں نبھائیں۔