لاک ڈاؤن میں خواتین کے خلاف گھریلو تشدد، 3.5 لاکھ افراد نے ٹوئٹر مہم کا مشاہدہ کیا

نئی دہلی: کووڈ-19 وبا کے پھیلاؤ پر قابو پانے کے لیے نافذ لاک ڈاؤن کے دوران گھریلو تشدد میں اضافے کے خلاف تقریبا 3.5 لاکھ افراد نے ٹوئٹر مہم کا مشاہدہ کیا۔ سینکڑوں افراد نے گزشتہ شام 10 سے زائد نجی تنظیموں نے ’لو میٹرس انڈیا‘ کی سربراہی میں چلائی جانے والی اس مہم میں حصہ لیا اور گھریلو تشدد کے بڑھتے ہوئے واقعات پر ٹوئٹ کیا اور تشویش کا اظہار کیا۔ دو گھنٹے کی ٹوئٹر مہم کو ساڑھے تین لاکھ افراد نے دیکھا۔

لو میٹرس کی سربراہ ویتِھکا یادو نے یو این آئی کو بتایا کہ اس مہم کے پہلے مرحلے میں 800 کے قریب افراد نے ٹوئٹ کیا، جس کی شروعات ہیش ٹیگ ’آخر کیوں‘ سے ہوئی اور گھریلو تشدد کے بڑھتے ہوئے واقعات کی وجوہات پر اپنی رائے کا اظہار کیا۔ انہوں نے کہا، ’نیشنل ویمن فار ویمن‘ کے تازہ ترین اعداد و شمار کے مطابق لاک ڈاؤن کے دوران ہندوستان میں گھریلو تشدد کے واقعات دوگنے ہوچکے ہیں۔ یہ اضافہ دیکھ کر ہم نے کل سے ہی اس کے خلاف ٹوئٹر مہم شروع کی ہے‘۔

اس مہم میں پاپولیشن فاؤنڈیشن آف انڈیا انٹرنیشنل سینٹر وائس سرچ ویمن، شکتی شالِنی، میش پروجیکٹ فاؤنڈیشن، بریک تھرو سی آر اے، وائس آف یوتھ، گلیکسی میگزین ڈاکٹرس ہینڈ اور دیگر اداروں نے حصہ لیا۔ ویتِھکا یادو نے کہا کہ اس مہم میں صنفی غور و خوض اور ایل جی بی ٹی کمیونٹی نے بھی حصہ لیا اور اپنے خیالات کا اظہار کیا۔ سب نے کہا کہ گھریلو تشدد کو روکنے کے لیے معاشرے میں تبدیلی لانا ضروری ہے اور قوانین کا سختی سے استعمال بھی ضروری ہے۔

پاپولیشن فاؤنڈیشن کی ایگزیکٹو ڈائریکٹر، پونم مٹریجا نے کہا کہ اس مہم کو قومی سطح پر ملک کی تمام ہندوستانی زبانوں میں میڈیا کے ہر سطح پر چلانے کی ضرورت ہے۔ ایل جی بی ٹی کمیونٹی نے کہا کہ ہماری کمیونٹی کو گھر میں سب سے زیادہ ذہنی اذیت ملتی ہے۔