دیوالی کے بعد بھی دہلی کی ہوا مسلسل خراب! آنند وہار میں ایئر کوالٹی انڈیکس 440 تک پہنچا

نئی دہلی: دیوالی کے بعد دہلی کی ہوا دن بہ دن خراب ہوتی جارہی ہے۔ آج یعنی 28 اکتوبر کو ملک کی راجدھانی کا اوسط ایئر کوالٹی انڈیکس (اے کیو آئی) 345 ریکارڈ کیا گیا، جسے انتہائی ناقص زمرے میں سمجھا جاتا ہے۔ وہیں، دہلی کے آنند وہار میں اے کیو آئی 440 تک پہنچ گیا ہے، جو سنگین زمرے میں آتا ہے۔ آلودگی کی اس سطح سے صحت مند افراد کی صحت بھی متاثر ہوتی ہے اور یہ بیماری میں مبتلا افراد کے لیے تشویشناک صورتحال ہے۔

سنٹرل پولوشن کنٹرول بورڈ کے اعداد و شمار کے مطابق 28 اکتوبر کو راجدھانی کے کئی علاقوں میں ہوا کے معیار کا انڈیکس 300 سے تجاوز کر گیا ہے، جوکہ انتہائی خراب زمرے میں آتا ہے۔ راجدھانی کے دہلی کے مختلف علاقوں کی بات کریں تو علی پور میں اے کیوں 365 (انتہائی خراب) درج کیا گیا، جبکہ شادی پور میں 365 (انتہائی خراب)، دوارکا میں 393 (انتہائی خراب)، جہانگیرپوری میں 394 (انتہائی خراب)، وویک وہار 391 (انتہائی خراب)، اوکھلا 346 (انتہائی خراب)، آنند وہار 440 (تشویش ناک) درج کیا گیا۔

مرکزی آلودگی کنٹرول بورڈ (سی پی سی بی) کے اعداد و شمار کے مطابق جمعرات کی صبح دہلی میں ایئر اے کیو آئی 333 تھا، جبکہ بدھ کی صبح یہ 262 ریکارڈ کیا گیا تھا۔ اعداد و شمار کے مطابق دہلی کا اے کیو آئی منگل کی شام 303 تھا، جبکہ دیوالی کے دن پیر کے روز یہ 312 ریکارڈ کیا گیا تھا۔

دیوالی کے بعد اے کیو آئی میں مسلسل گراوٹ کے بعد ایئر کوالٹی انڈیکس میں آج ایک بار پھر تیزی سے اضافہ ہوا۔ محکمہ موسمیات کے مطابق دہلی میں ہوا کے معیار کے بگڑنے کی بڑی وجہ درجہ حرارت اور ہوا کی رفتار میں کمی بتائی جا رہی ہے، جو آلودگی کے ذرات کے جمع ہونے کے لیے سازگار سمجھے جاتے ہیں۔