دہلی کے نائب وزیر اعلی منیش سسودیا نے اہل خانہ کے ساتھ کورونا ویکسین کی پہلی خوراک لی

نئی دہلی: دہلی کے نائب وزیر اعلی منیش سسودیا نے ہفتہ کے روز مولانا آزاد میڈیکل کالج میں اپنے اہل خانہ کے ہمراہ کورونا ویکسین کی پہلی خوراک حاصل کی۔ انہیں ہندوستان بائیوٹیک کی جانب سے تیار کردہ کوویکسین کا ٹیکہ لگایا گیا۔

ویکسین لگوانے کے بعد نائب وزیر اعلی منیش سسودیا نے کورونا جنگجوؤں کا شکریہ ادا کیا اور کہا کہ ہمارے سائنس دانوں، ڈاکٹروں نے مشکل وقت میں اس کورونا وبا سے لڑتے ہوئے ویکسین تیار کی۔ دہلی کے عوام سے اپیل کرتے ہوئے انہوں نے کہا کہ کورونا پروٹوکول کو مدنظر رکھتے ہوئے 45 سال سے اوپر کے تمام افراد اس وبا کو شکست دینے کے لئے لازمی طور پر ٹیکہ لگوائیں۔

نائب وزیر اعلی نے کہا کہ ہماری مرکزی حکومت سے اپیل ہے کہ وہ دہلی کو ویکسین کی فراہمی میں اضافہ کریں اور 45 سال سے کم عمر لوگوں کو بھی ٹیکہ کاری کے دائرے میں لایا جائے۔ انہوں نے کہا کہ اگر کورونا کی چین کو توڑنا ہے تو پھر ہر عمر کے لوگوں کو یہ ٹیکہ لگوانا ضروری ہے اور اگر ویکسین دستیاب ہے تو دہلی حکومت 3 سے 4 ماہ کے اندر پوری دہلی کو ٹیکہ لگا سکتی ہے۔

صحافیوں سے بات چیت کے دوران نائب وزیر اعلی نے کہا کہ کورونا کو روکنے کے لئے لاک ڈاؤن کوئی حل نہیں ہے، صرف بڑے پیمانے پر ماسک اور ویکسین کے ذریعے ہی کورونا کے سلسلہ کو توڑا جا سکتا ہے۔