دہلی: تیس ہزاری کورٹ احاطے میں پولس اور وکلاء کے مابین جھڑپ، کئی وکیل زخمی

نئی دہلی: دہلی پولس اور وکلاء کے درمیان تیس ہزاری کورٹ احاطے میں ہفتے کے روز جھڑپ ہوگئی جس میں ایک وکیل زخمی ہوگیا جسے اسپتال میں داخل کروایا گیا ہے۔ یہ واقعہ 2 سے تین بجے سہ پہر کے درمیان کا ہے۔ دونون فریقوں میں تو تو میں میں سے شروع ہوئی بات مار پیٹ تک پہنچ گئی۔

ذرائع نے بتایا کہ پارکنگ کے سلسلے میں شروع ہونے والے جھگڑے میں پولس اور وکیلوں کے درمیان جھڑپ ہوگئی ہے۔ اس دوران پولس کی کچھ گاڑیوں میں آگ لگا دی گئی ہے اور گولی چلنے کی آواز بھی سنی گئی ہے۔

تیس ہزاری کورٹ کے وکیل اور اس وقت حوالات میں قید ستیندر شرما نے ہفتہ کی شام خبر رساں ایجنسی آئی این ایس کو بتایا، ’’یہ واقعہ ڈھائی بجے دب کے قریب پیش آیا۔ لڑائی دو تین وکلاء اور کچھ پولس اہلکاروں کے مابین ہوئی تھی۔ بعد ازاں جائے وقوعہ پر دونوں طرف سے مزید افراد جمع ہو گئے۔‘‘

انہوں نے مزید کہا، ’’جھگڑے کی وجہ ابھی واضح نہیں ہے۔ میں خود ابھی پولس لاک اپ سے ہی بات کر رہا ہوں۔ ہاں، واقعہ پیش آیا ہے اور گولی بھی لگی ہے۔ فائرنگ کس نے کی تفتیش کا موضوع ہے لیکن ہمارے ایک وکیل ساتھی کو گولی مار دی گئی ہے۔ زخمی وکیل کو سینٹ اسٹیفنس اسپتال میں داخل کرایا گیا ہے۔‘‘

(یو این آئی ان پٹ کے ساتھ)