ہندوستان میں بھی کورونا وائرس کی دہشت، بہار اور راجستھان میں مشتبہ افراد داخل اسپتال

بہار کے چھپرہ سے تعلق رکھنے والی ایک لڑکی چین سے ہندوستان آئی جسے بخار تھا اور راجستھان کے جے پور سے تعلق رکھنے والا ایک شخص ایم بی بی ایس کر کے چین سے لوٹا ہے۔ دونوں کی اسپتال میں جانچ چل رہی ہے۔

تصویر سوشل میڈیا
تصویر سوشل میڈیا
user

قومی آوازبیورو

چین میں کورونا وائرس کی وجہ سے اب تک 80 ہلاکتوں کی خبریں موصول ہو چکی ہیں اور اب دوسرے ممالک میں بھی اس کورونا وائرس سے دہشت کا ماحول دیکھنے کو مل رہا ہے۔ جہاں ایک طرف امریکہ میں پانچ افراد کے اس وائرس میں مبتلا ہونے کی خبریں سامنے آئی ہیں وہیں ہندوستان میں بھی دو افراد کو اس کورونا وائرس میں مبتلا ہونے کے خدشہ کے بعد اسپتال میں داخل کرایا گیا ہے۔ ایک مریض کا تعلق چھپرہ سے ہے جس کی چین سے واپسی ہوئی ہے اور ایک جے پور کا رہنے والا ہے جو چین میں ایم بی بی ایس کی پڑھائی کر رہا تھا اور ہندوستان واپس آیا ہے۔


پہلے معاملے میں بہار کے سارن ضلع کے چھپرہ سٹی تھانہ علاقے کے ایک محلے کی ایک لڑکی میں جان لیوا کورونا وائرس پائے جانے کے خدشے کے پیش نظر بہتر علاج کے لئے اسے پٹنہ میڈیکل کالج اسپتال بھیجا گیا ہے۔ سارن کے سول سرجن مدھیشور نے آج یہاں بتایا کہ سٹی تھانہ علاقے کی 22 سالہ لڑکی چین میں میڈیکل کی تعلیم حاصل کر رہی ہے اور وہ گزشتہ 22 جنوری کو یہاں آئی تھی۔ لڑکی کی طبیعت خراب ہونے کے بعد اسے دو دن قبل چھپرہ میڈیکل کالج اسپتال میں داخل کرایا گیا تھا۔ انہوں نے بتایا کہ خدشہ ظاہر کیا جارہا ہے کہ طالبہ چین کے کورونا وائرس کی زد میں ہے۔

جھا نے بتایا کہ طالبہ کو اسپتال میں داخل کرنے کے بعد پوری چوکسی برتی گئی اور ڈاکٹروں کی ایک ٹیم نے اس کی جانچ کی۔ انہوں نے بتایا کہ طالبہ کی طبیعت زیادہ خراب ہونے کے بعد کل شام اسے بہتر علاج کے لئے پٹنہ میڈیکل کالج اسپتال ریفر کیا گیا ہے۔


واضح رہے کہ چین کے مختلف صوبے تیزی سے پھیلنے والے مہلک کورونا وائر کی زد میں ہیں جس کے سبب اب تک 80 لوگوں کی موت ہوچکی ہے۔ چین میں اس وائرس کے ابھی تک 2454 معاملے سامنے آئے ہیں جبکہ رپورٹ ہے کہ دنیا میں اس سے متاثر ہونے والوں کی تعداد 2504 ہے۔

دوسری طرف چین میں پھیلے کوروناوائرس کامشتبہ مریض راجستھان میں بھی سامنے آنے کے بعد افرا تفری پیدا ہو گئی۔ مشتبہ مریض کو دارالحکومت جےپور کے سوائی مان سنگھ اسپتال میں داخل کرایاگیا ہے۔اسپتال ذرائع کے مطابق مریض کی دیکھ بھال کرنے کےلئے ڈاکٹروں کی ٹیم بنائی گئی ہے اور برابر اس کی نگرانی کی جارہی ہے۔مریض کے خون کے نمونوں کی جانچ مہاراشٹر کے پنے لیب میں کرائی جائےگی۔مریض جےپور کے سانگانیر علاقے کا رہنے والا بتایا جا رہا ہے جو چین سے ایم بی بی ایس کرکے لوٹا ہے۔


طب اور صحت محکمے نے کورونا وائرس کے سلسلے میں الرٹ بھی جاری کیا ہے۔محکمے نے جے پور،باڑمیر،ہنومان گڑھ اور سیکر ضلع کے چیف میڈیکل افسر کو الرٹ بھی بھیجا ہے۔نئی دہلی میں واقع نیشنل سینٹر فور ڈسیز کنٹرول نے ریاست کے طب اور صحت محکمے کو ریاست میں چین سےا ٓئے 18مسافروں کی فہرست بھی بھیجی ہے۔ اس کے بعد طب اور صحت کے وزیر ڈاکٹر رگھو شرما نے اتوار کو ایس ایم ایس میڈیکل کالج انتطامیہ کو چین سے ایم بی بی ایس کی پڑھائی کرکے آئے ڈاکٹر کے کورونا وائرس میں مبتلا ہونے کا خدشہ ہونے پر مشتبہ مریض کو فوراً آئیسولیشن میں رکھنے اور ان کے پورے کنبے کی طبی جانچ کرانے کی ہدایت دی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔