افغانستان مسئلہ پر کانگریس کا حکومت کے ساتھ مل کر کام کرنے کا عزم

نئی دہلی: کانگریس نے کہا ہے کہ افغانستان کا مسئلہ پورے ملک کا مسئلہ ہے، لہٰذا پارٹی اس مسئلے پر حکومت کے ساتھ مل کر کام کرے گی۔ وزیر خارجہ ایس جے شنکر کی جانب سے یہاں افغانستان کے بارے میں منعقدہ کل جماعتی میٹنگ کے بعد راجیہ سبھا میں کانگریس کے رہنما ملکارجن کھڑگے نے کہا کہ وزیر خارجہ نے میٹنگ کے دوران ان کے کئے گئے تمام سوالات کے جوابات دیئے ہیں اور انہیں یقین ہے کہ حکومت اسی سمت میں کام کرے گی۔

https://twitter.com/ANI/status/1430827348413370371?s=20

ملکارجن کھڑگے نے بتایا کہ حکومت افغانستان کے حوالے سے ’دیکھو اور انتظار کرو‘ کی پالیسی پر عمل پیرا ہے اور پوری اپوزیشن نے اجلاس میں حکومت کی اس پالیسی کی حمایت کی ہے۔ انھوں نے میڈیا سے بات چیت کے دوران یہ بھی کہا کہ ہمیں ملک اور عوام کے مفاد میں متحد ہو کر رہنا ہے اور ہم افغانستان معاملہ میں حکومت کے ساتھ مل کر کام کریں گے۔