بی جے پی کا واحد متبادل کانگریس: نانا پٹولے
وقت کی ضرورت ہے کہ تمام ہم خیال سیاسی جماعتیں انفرادی عزائم کو بالائے طاق رکھتے ہوئے اکٹھے ہو کر قومی مفاد، جمہوریت اور آئین کے لیے جدوجہد کریں۔
مہاراشٹر کانگریس کے صدر نانا پٹولے نے بدھ کو کہا کہ بھارتیہ جنتا پارٹی (بی جے پی) ملک کے آئین اور جمہوریت کے لیے خطرہ ہے، کانگریس کی صدر سونیا گاندھی اور پارٹی کے رہنما راہل گاندھی کی قیادت میں کانگریس پارٹی مسلسل بی جے پی کے آمرانہ رویے کے خلاف لڑ رہی ہے۔
ایک ریاست تک محدود سیاسی جماعت بی جے پی کا متبادل نہیں ہو سکتی۔ کانگریس کے ریاستی صدر نے کہا کہ کانگریس ہی بی جے پی کے لیے واحد قابل عمل سیاسی متبادل ہے۔ انہوں نے کہا کہ ملک انفرادی عزائم سے زیادہ اہم ہے اور بی جے پی کے خلاف گھمنڈ کو الگ رکھ کر متحد ہو کر لڑنے کی ضرورت ہے۔
مغربی بنگال کی وزیر اعلیٰ ممتا بنرجی کے بیان پر ردعمل کا اظہار کرتے ہوئے نانا پٹولے نے کہا کہ بی جے پی اقتدار، پیسے اور تمام خود مختار اداروں کا غلط استعمال کرکے ملک کی جمہوریت اور آئین کو تباہ کرنے کی کوشش کر رہی ہے۔ کانگریس بی جے پی کے آمرانہ رویہ کے خلاف مسلسل جد و جہد کر رہی ہے۔
انہوں نے کہا کہ راہل گاندھی ہی وزیر اعظم نریندر مودی اور بی جے پی کے خلاف مضبوطی سے کھڑے رہے ہیں۔ مسٹر گاندھی نے تحویل اراضی قانون اور تین کالے زرعی قوانین کے معاملے پر کسانوں کے ساتھ مضبوطی سے کھڑے ہو کر مودی حکومت کے خلاف جنگ لڑی۔ کانگریس بی جے پی کی تقسیم کرنے والی پالیسیوں، مہنگائی، بے روزگاری، کسان مخالف پالیسیوں کے خلاف مسلسل لڑ رہی ہے۔ حالات کی سنگینی کو دیکھتے ہوئے اب وقت آگیا ہے کہ تمام ہم خیال سیاسی جماعتیں انفرادی عزائم کو بالائے طاق رکھتے ہوئے اکٹھے ہو کر قومی مفاد، جمہوریت اور آئین کے لیے جدوجہد کریں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔