فرقہ پرستی مسلمانوں کے لیے ہی نہیں پورے ملک کے لیے خطرناک: مولانا ارشد مدنی

جمعیۃ علماء ہند کے صدر مولانا ارشد مدنی نے آج میڈیا سے خطاب کرتے ہوئے کہا کہ فرقہ پرستی صرف مسلمانوں کے لیے ہی نہیں بلکہ پورے ملک کے لیے خطرناک ہے۔ مولانا ارشد مدنی نے آج ملکی حالات اور نفرت و خوف کے ماحول پر مبنی میڈیا کے کئی سوالوں کا جواب دیا۔ ایک سوال کے جواب میں انھوں نے کہا کہ "یقیناً ہندوستان خراب دور سے گزر رہا ہے۔ میں تو کہوں گا کہ اس طرح کے حالات ملک کی تقسیم کے وقت بھی پیدا نہیں ہوئے تھے۔ اس وقت مار کاٹ اور قتل کا ماحول ضرور تھا، لیکن ہمارا سماج فرقہ پرستی کی بنیاد پر تقسیم نہیں ہوا تھا۔"

اپنی بات کو آگے بڑھاتے ہوئے مولانا ارشد مدنی نے کہا کہ "جمعیۃ علماء ہند ملک کی آزادی کے بعد سے ہی ان خطرات کو محسوس کر رہی ہے اور اس نے ایک بار نہیں بلکہ ہر موقع پر اور ہر سطح پر بار بار آگاہ کیا کہ فرقہ پرستی کے ڈنک کو ختم کرو۔ اگر اسے ختم نہیں کیا گیا تو ملک اس جگہ پر پہنچ جائے گا جہاں چاہ کر بھی سنبھالنا مشکل ہوگا۔" انھوں نے مزید کہا کہ "مجھے فکر اس بات کی ہے کہ ملک کی آزادی کے بعد جو لوگ برسراقتدار آئے انھیں بھی ایسے حالات کے پیدا ہونے کا احساس تھا اس کے باوجود انھوں نے اس جانب کوئی دھیان نہیں دیا۔ اگر دھیان دیا گیا ہوتا تو آج حالات ایسے نہ ہوتے۔ ہندوستان کے لیے کانگریس کی خدمات کو فراموش نہیں کیا جا سکتا، ہمیں افسوس صرف اس بات کا ہے کہ آج جو چیزیں ہو رہی ہیں، یہ تو ہم پہلے سے جانتے تھے۔ آج ایک خاص ذہنیت کو ملک پر تھوپنے کی کوشش ہو رہی ہے جو نقصان دہ ہے۔"

جب مولانا ارشد مدنی سے یہ سوال کیا گیا کہ کیا آج جو کچھ ہو رہا ہے اس کے پیچھے کوئی خاص نظریہ کام کر رہا ہے؟ تو انھوں نے جواب دیا کہ "پہلی نظر میں تو یہی کہا جاتا ہے کہ سب کچھ انجانے میں ہو رہا ہے، لیکن ایسا ہے نہیں۔ گائے کی حفاظت کا معاملہ ہو یا حب الوطنی کا، ان سب کے پیچھے ایک منصوبہ بند سازش کا اصول کام کر رہا ہے۔ سب جانتے ہیں کہ اس کے پیچھے ایک ایسی تنظیم کا ہاتھ ہے جو طویل مدت سے نظریاتی جنگ لڑ رہی ہے۔ یہ نظریاتی جنگ ہندو راشٹر کے قیام کے لیے ہے۔ یہ تو آر ایس ایس کا ایک ویژن ہے اور اس مشن کے تحت ملک کو چلایا جا رہا ہے۔ اگر آر ایس ایس نہیں چاہتا تو کیا ملک کا نقشہ ایسا ہو سکتا تھا جو آج دنیا کے سامنے ہے۔ یہ آر ایس ایس کی پالیسی ہے جسے ہم لوگ پہلے سے جانتے تھے اور یہی نظریہ گوالوالکر اور ساورکر کی تحریر میں موجود ہے۔"