کامن ویلتھ کھیل: خواتین کرکٹ میں ہندوستان نے پاکستان کو 8 وکٹ سے شکست دی

برمنگھم: اسنیہ رانا اور رادھا یادو (دو دو وکٹ) کی قیادت میں گیند بازوں اور اسمرتی مندھانا کی شاندار 63 ناٹ آؤٹ اننگز کی مدد سے ہندوستان نے پاکستان کو کامن ویلتھ گیمز کے خواتین کرکٹ ٹورنامنٹ گروپ اے کے ایک میچ میں اتوار کو یکطرفہ انداز میں آٹھ وکٹوں سے شکست دی۔

ہندوستان نے پاکستان کو 18 اوور میں صرف 99 رن پر آؤٹ کرنے کے بعد 11.4 اوور میں دو وکٹ پر 102 رن بنا کر ٹورنامنٹ میں دو میچوں میں اپنی پہلی جیت درج کی۔ مندھانا نے آٹھ چوکوں اور تین چھکوں کی مدد سے 42 گیندوں پر ناٹ آؤٹ 63 رن کی میچ جیتانے والی اننگز کھیلی۔ شیفالی ورما نے 16 اور ایس میگھنا نے 14 رن بنائے جب کہ جمائمہ روڈریگز دو رن بنا کر ناٹ آؤٹ رہیں۔

پاکستان کو مسلسل دوسری شکست کا سامنا کرنا پڑا۔کامن ویلتھ گیمز کا آغاز ہندوستانی ٹیم کے لیے اچھا نہیں رہا۔ میچ پر حاوی ہونے کے باوجود آسٹریلیا نے آخری دس اوور میں اس سے پہلا میچ چھین لیا تھا۔ اسی لیے ہندوستان کو نہ صرف یہ میچ جیتنا تھا بلکہ اسے اچھے طریقے سے جیتنا تھا اور ایسا لگتا ہے کہ ہندوستانی خواتین ٹیم اس کے لیے تیار ہو کر آئی تھی۔ پہلے ہندستانی گیندباز بالخصوص اسپنروں اور فیلڈروں نے پاکستانی بلے بازوں کو باندھے رکھا، جب کہ اس کے بعد بلے بازوں نے میچ کو جلد از جلد ختم کرنے کو یقینی بنایا۔ اسمرتی مندھانا آج معجزاتی دکھائی دے رہی تھیں۔

انہوں نے 8 چوکوں اور 3 چھکوں کی مدد سے 150 کے اسٹرائیک ریٹ سے رن بنائے اور شاندار اننگز کھیلی۔ اب ہندوستان کا مقابلہ 3 اگست کو بارباڈوس سے ہوگا۔

اس سے قبل پاکستان کی شروعات اچھی رہی اور میچ 6 اوور اچھے رہے لیکن پھر ہندستانی گیند بازوں نے تہلکہ مچا دیا۔ آخری 8 گیندوں پر آدھی ٹیم پویلین بھیج دی گئی۔ ہندوستانی گیندبازوں نے آج شاندار گیندبازی کی۔ ندا ڈار کی عدم موجودگی کی وجہ سے آج پاکستان کی ٹیم اتنی مضبوط نظر نہیں آ رہی تھی۔

پاکستان کی بلے باز مسلسل وکٹیں گنواتی رہیں اور جب بھی انہوں نے رن کی رفتار بڑھانے کی کوشش کی تو وکٹیں گنوا کر اس کا خمیازہ بھگتنا پڑا۔ ہندستان کی جانب سے اسنیہ رانا اور رادھا یادیو نے دو دو وکٹیں حاصل کیں۔ پاکستان کی چھ بلے باز ڈبل فیگر کو بھی نہ پہنچ سکیں۔ اوپنر منیبہ علی نے 32 اور عالیہ ریاض نے 18 رن بنائے۔