چھتیس گڑھ: تصادم میں شہید جوانوں کی تعداد میں اضافے کا خدشہ، وزیر اعظم کا اظہار افسوس

بیجا پور: چھتیس گڑھ کے بیجا پور ضلع میں پولیس اور ماؤ نوازوں کے مابین کافی دیر تک جاری رہے تصادم میں ایک دن بعد آج صبح خدشہ طاہر کیا جا رہا ہے کہ شہید جوانوں کی تعداد میں مزید اضافہ ہو سکتا ہے۔ تصادم میں کل دیر رات تک پانچ جوانوں کے شہید ہونے اور ایک ماؤ نواز کے ہلاک ہونے کے علاوہ تقریباً تین جوانوں کے زخمی ہونے کی تصدیق ہوئی تھی۔

پولیس ذرائع نے آج صبح بتایا کہ تصادم کا مقام یہاں سے تقریباً 75 کلو میٹر دور ہے اور وہاں سے اب بھی جوانوں کی واپسی کا انتظار ہے۔ تصادم کل دن میں تقریباً دو بجے شروع ہوا تھا اور دیر شام تک جاری رہا تھا۔ جائے واقعہ گھنے جنگل میں پولیس کی مشترکہ گشتی ٹیم پر ماؤ نوازوں نے حملہ کیا تھا ۔ پہاڑیوں سے گھرے علاقے میں کل دیر رات تک پانچ جوانوں کے شہید ہونے کی تصدیق سینئر افسر نے کی تھی۔ زخمیوں میں سے 12 جوانوں کو کل دیر شام ہی ہیلی کاپٹر سے رائے پور بھیج دیا گیا تھا، باقی تقریبا ً 24 جوانوں کو علاج کے لئے بیجا پور اسپتال لایا گیا تھا۔

پولیس کا کہنا ہے کہ یہ تصادم بیجا پور اور سکما ضلع کی سرحد پر ترریم علاقے کے جنگلوں میں ہوا۔ بتایا گیا ہےکہ یہاں پر کچھ دنوں سے ماؤنوازوں کے یکجا ہونے کی اطلاع پر گشتی ٹیم بھیجی گئی تھی۔ گشتی ٹیم میں سیکڑوں جوان شامل تھے۔ شہید اور زخمی ہوئے جوانوں کے ناموں کے بارے میں بتانا باقی ہے۔

وزیر اعظم مودی کا اظہار تعزیت

وزیر اعظم نریندر مودی نے جوانوں کی شہادت پر افسوس کا اظہار کیا ہے۔ انہوں نے کہا کہ جوانوں کی قربانی کو کبھی فراموش نہیں کیا جائے گا۔ وزیر اعظم نے ٹوئٹ کیا، ’’میری تعزیت چھتیس گڑھ میں جوان ہوئے شہید جوانوں کے ساتھ ہے۔ بہادر جوانوں کی قربانی کو کبھی فراموش نہیں کیا جا سکے گا۔ زخمیوں کی جلد صحبت یابی کے لئے میری نیک تمنائیں۔‘‘

نائب صدر کا خراج عقیدت

نائب صدر جمہوریہ ہند ایم وینکیا نائیڈو نے چھتیس گڑھ میں ماؤ نوازوں کے حملے میں شہید ہوئے جوانوں کو خراج عقیدت پیش کیا ہے۔ نائیڈو نے اتوار کو یہاں جاری ایک پیغام میں کہا کہ وہ حملے میں زخمی جوانوں کی جلد صحت یابی کی تمنا کرتے ہیں۔

نائب صدر نے کہا ’’میں چھتیس گڑھ میں ماؤنواز مخالف مہم میں شہید ہوئے حفاظتی دستوں کے جوانوں کو خراج عقیدت پیش کرتا ہوں اور اس مہم میں زخمی جوانوں کی جلد صحتیابی کے لئے دعا گو ہوں۔ میں فوجیوں کے اہل خانہ سے دلی تعزیت کا اظہار کرتا ہوں۔‘‘