مرکزی حکومت مہاراشٹر کے ساتھ امتیازی سلوک کر رہی ہے، وزیر اعظم مودی کے بیان پر ادھو ٹھاکرے کا جواب

نئی دہلی: وزیر اعظم نریندر مودی نے ریاستوں سے پٹرول-ڈیزل پر عائد ویٹ (ویلیو ایڈیڈ ٹیکس) کو کم کرنے کی اپیل کرتے ہوئے کہا ہے کہ اگر غیر بی جے پی حکومت والی ریاستیں چھ مہینے پہلے مرکز کی صلاح مان لیتیں تو عوام کو اس کا فائدہ ہوتا۔ وزیر اعظم مودی کے اس بیان پر مہاراشٹر کے وزیر اعلیٰ ادھو ٹھاکرے نے سخت ردعمل کا اظہار کیا ہے۔ انہوں نے کہا کہ مرکزی حکومت کو تمام ریاستوں کے ساتھ یکساں سلوک کرنا چاہئے۔

ادھو ٹھاکرے نے کہا کہ "مہاراشٹر سب سے زیادہ ٹیکس ادا کرنے والی ریاست ہے لیکن اقتصادی محاذ پر مرکزی حکومت مہاراشٹر کے ساتھ امتیازی سلوک کر رہی ہے۔ مرکز پر 26500 کروڑ روپے کے جی ایس ٹی کے بقایاجات ابھی تک موصول نہیں ہوئے ہیں۔ مرکزی حکومت کو تمام ریاستوں کے ساتھ یکساں سلوک کرنا چاہیے۔‘‘

وزیر اعلیٰ کے دفتر سے جاری بیان میں کہا گیا ہے کہ ’’مہاراشٹر میں ایک لیٹر ڈیزل پر 24 روپے 38 پیسے کا مرکزی ٹیکس اور 22 روپے 37 پیسے کا ریاستی ٹیکس عائد ہوتا ہے۔ دوسری جانب پٹرول پر 31 روپے 58 پیسے مرکزی کی طرف سے اور 32 روپے 55 پیسے ریاستی کی طرف سے ٹیکس لگتا ہے۔ لہذا یہ کہنا غلط ہوگا کہ ریاست میں پٹرول اور ڈیزل کی قیمتوں میں اضافہ کا سبب ریاست کی طرف سے عائد ہونے والا ٹیکس ہے۔‘‘

خیال رہے کہ وزرائے اعلیٰ کے ساتھ کورونا کے حوالہ سے منعقد کی گئی جائزہ میٹنگ کے دوران وزیر اعظم نریندر مودی نے کہا کہ کچھ ریاستوں نے اپنے ٹیکس میں کمی کی ہے لیکن کچھ ریاستوں نے اس کا فائدہ اپنے لوگوں کو نہیں دیا۔ انہوں نے کہا کہ مہاراشٹر، مغربی بنگال، تلنگانہ، آندھرا پردیش، کیرالہ، جھارکھنڈ، تمل ناڈو نے کسی نہ کسی وجہ سے مرکزی حکومت کی بات نہیں سنی اور ان ریاستوں کے شہریوں پر بوجھ پڑتا رہا۔ انہوں نے کہا کہ میری اپیل ہے کہ ویٹ میں کمی کا جو کام نومبر میں کیا جانا تھا وہ اب کریں اور شہریوں کو فائدہ پہنچائیں۔