ادھو ٹھاکرے کے استعفی کے بعد بی جے پی میں جشن، حکومت سازی کی تیاری

ممبئی: مہاراشٹر میں جاری سیاسی گھمسان کے درمیان بدھ کی شام ادھو ٹھاکرے نے اپنے عہدے سے استعفیٰ دے دیا اور اس کے ساتھ ہی بی جے پی میں جشن شروع ہو گیا۔ ممبئی کے تاج ہوٹل میں بی جے پی لیڈران مٹھائی باٹتے اور نعرے لگاتے ہوئے نظر آئے۔ قبل ازیں، منگل کی شام دیویندر فڈنویس نے گورنر بھگت سنگھ کوشیاری سے ملاقات کی تھی۔

مہاراشٹر کے گورنر نے ادھو حکومت کو آج یعنی جمعرات کو صبح 11 بجے اکثریت کا امتحان دینے کا حکم دیا تھا، جس کے خلاف شیو سینا نے سپریم کورٹ میں عرضی داخل کی تھی۔ ادھو ٹھاکرے جن کے حامی قانون سازوں کی تعداد 15 تک محدود ہو گئی ہے، انہوں نے سپریم کورٹ سے استدعا کی تھی کہ جمعرات کو طلب کئے گئے فلور ٹیسٹ پر روک لگائی جائے۔

ذرائع کا کہنا ہے کہ ادھو ٹھاکرے کے استعفی کے بعد اب بی جے پی کے دیویندر فڈنویس حکومت سازی کا دعویٰ پیش کر سکتے ہیں۔ شیو سینا کے باغی لیڈر ایکناتھ شندے، جن کی بغاوت نے مہاراشٹر کے سیاسی بحران کی شروعات کی تھی، انہیں نائب وزیر اعلیٰ بنایا جا سکتا ہے۔

پہلے ہی اس طرح کی قیاس آرائیاں کی جا رہی تھیں کہ اگر سپریم کورٹ کا فیصلہ شیو سینا کے حق میں نہیں جاتا تو ادھو ٹھاکرے وزیر اعلیٰ کے عہدے سے استعفیٰ دے سکتے ہیں۔ بدھ کی شام منعقد ہونے والے مہاراشٹر کابینہ کے اجلاس نے بھی چہ میگوئیوں کو ہوا دی، جس کے دوران حکومت نے تین شہروں اورنگ آباد، عثمان آباد اور نوی ممبئی کے نام تبدیل کر دئے اور ٹھاکرے نے رسمی طور پر وزرا کے تعاون کے لئے شکریہ ادا کیا۔

ٹھاکرے نے فیس بک لائیو پر آکر استعفی کا اعلان کرتے ہوئے کہا ’’جن لوگوں کو ہم نے بڑا کیا اور بنایا انہوں نے ہمارے ساتھ دھوکہ کیا۔ میں غیر متوقع طور پر اقتدار میں آیا اور اسی طرح سے باہر جا رہا ہوں۔ شیو سینا ایک خاندان ہے اور ہم اسے ٹوٹنے نہیں دیں گے۔ میں کہیں نہیں جا رہا!‘‘