بی جے پی کا مقصد گیان واپی کا مسئلہ اٹھا کر مہنگائی سے عوام کی توجہ ہٹانا ہے: اکھلیش

سماج وادی پارٹی کے صدر اکھلیش یادو نے کہا ہے کہ بھارتیہ جنتا پارٹی کی حکومت مہنگائی سے عوام کی توجہ ہٹانے اور سرکاری اداروں کو بیچنے کے لیے گیان واپی اور تاج محل جیسے مسائل کو ہوا دے رہی ہے۔

یادو نے کہا کہ بی جے پی نے اپنے فائدے کے لیے کئی اپوزیشن بنائے ہیں اور آج کل کئی پارٹیوں کی طرف سے مسلمانوں کو ایس پی سے الگ کرنے کی سازش ہورہی ہے، جسے عوام کامیاب نہیں ہونے دیں گے۔ انہوں نے کہا کہ حکومت بنیادی مسائل پر کام نہیں کر رہی۔ بی جے پی کی سازش ہے ملک میں 'ون نیشن ون انڈسٹر یلسٹ‘ کی پالیسی کو موثر بنایا جائے۔ مہنگائی، بے روزگاری پر حکومت کے پاس کوئی جواب نہیں۔ اگر راشن جیسی سہولت بھی ختم کر دی جائے تو یہاں کا حال بھی سری لنکا جیسا ہو جائے گا۔

ایس پی سپریمو اعظم گڑھ ضلع کے پھول پور کے سابق ایم ایل اے شیام بہادر یادو کی والدہ اور قانون ساز کونسل کے سابق رکن رام آسرے وشوکرما کی اہلیہ کے انتقال کے بعد ان کی تعزیتی میٹنگ میں شرکت کے لیے آئے تھے۔

انہوں نے کہا کہ سماجوادیوں کا اعظم گڑھ سے گہرا رشتہ ہے۔ آنے والے دنوں میں بھی لوگ ایس پی کے ساتھ ہوں گے۔ سابق وزیر اعلیٰ نے کہا کہ بی جے پی بنیادی سوالات سے عوام کی توجہ ہٹا رہی ہے۔ اس وقت مہنگائی سب سے بڑا مسئلہ ہے، جو عوام کے لیے پریشانی کا باعث بنتا جا رہا ہے۔ جب بھی بی جے پی کو بنیادی مسائل سے عوام کی توجہ ہٹانی ہوتی ہے تو وہ مندر مسجد جیسے مسائل کو اٹھاتی ہے۔ گیان واپی اور تاج محل جیسے معاملات بھی ان میں سے ایک ہیں۔

مسٹر یادو نے حیرت کا اظہار کیا کہ آج اسی تاج محل کے بارے میں کیا کہا جا رہا ہے، جس وزیر اعظم نے تاج محل سے ایک ٹریلین ڈالر معیشت کی بات کی تھی۔