بنگال: 31 مارچ تک لاک ڈاؤن نافذ، ممتا نے لیا مختلف سرکاری اسپتالوں کا جائزہ

کولکاتا: وزیرا علیٰ ممتا بنرجی نے آج بنگال میں لاک ڈاؤن کی مدت میں اضافہ کرتے ہوئے 31 مارچ تک کرنے کا اعلان کیا ہے۔ جب کہ اس سے قبل 27 مارچ تک لاک ڈاؤن نافذ کرنے کا اعلان کیا تھا۔ اس سے قبل وزیرا علیٰ ممتا بنرجی نے کولکاتا شہر کے مختلف اسپتالوں آر جی کار، کلکتہ میڈیکل کالج و اسپتال، این آر ایس، ایس ایس کے ایم، نیشنل میڈیکل کالج و اسپتال کا دورہ کرکے اسپتال کی تیاریوں کا جائزہ لیا۔

وزیر اعلیٰ ممتا بنرجی نے بیان جاری کرتے ہوئے کہا کہ لاک ڈاؤن کی مدت میں اضافہ کرتے ہوئے 31مارچ تک کردیا گیا ہے اور یہ تمام ریاست میں نافذ ہوگا۔ جب کہ اس سے قبل دیہی علاقوں میں یہ لاک ڈاؤن نافذ نہیں کیا گیا تھا۔ دوا خانے اور دیگر ضروری دوکانوں کے علاوہ تمام دوکانیں بند ہیں۔ مرکزی کولکاتا کا دھرم تلہ اسکوائر جہاں ہمیشہ بھیڑ رہتی تھی وہاں بالکل سناٹا چھایا ہوا ہے۔

وزیرا علیٰ ممتا بنرجی نے کہا کہ ریاست میں صورت حال خراب ہونے سے قبل ہم نے یہ قدم اٹھایا ہے۔بنگال میں ابھی کورونا وائرس ابتدائی مرحلے میں ہے۔ ابھی تک کورونا وائرس سے متاثر افراد باہر سے آئے ہیں۔ یا پھر متاثر افراد کے قریب رہے ہیں۔ انہوں نے کہا کہ لوگوں کو متاثر کرنے میں وقت لگتا ہے۔ اس لئے لاک ڈاؤن کی مدت میں اضافہ کیا گیا ہے۔

ممتا بنرجی نے اسپتالو ں کا دورہ کرکے دوائیوں کے اسٹاک اور دیگر ضروری سامانوں سے متعلق جائزہ لیا۔ ممتا بنرجی کے اسپتالوں میں پہنچنے سے ڈاکٹروں کے حوصلوں میں اضافہ ہوا ہے۔ وزیرا علیٰ ممتا بنرجی نے کہا کہ ہمیں اپنے ڈاکٹروں پر فخر ہے، وہ پوری تندہی سے حالات کا مقابلہ کر رہے ہیں اور اپنے فرائض کو انجام دے رہے ہیں۔

وزیر اعلیٰ جنہوں نے اپنے چہرے کے نصف حصے کو بند کر رکھا تھا نے ڈاکٹروں سے بات چیت کی۔ کل ممتا بنرجی کی ہدایت پر کلکتہ میڈیکل کالج و اسپتال کو خالی کرادیا گیا ہے۔ یہاں صرف کورونا وائرس سے متاثر مریضوں کا علاج کیا جائے گا جب کہ اس وقت بیلیا گھاٹا آئی ڈی اسپتال میں کورونا وائرس سے متاثر مریضوں کا علاج کیا جارہا ہے۔

کل آل پارٹی میٹنگ میں ممتا بنرجی نے بتایا تھا کہ کورونا وائرس کے جانچنے کے لئے ریاست میں کٹس کی قلت ہے۔ انہوں نے کہا کہ کوئی بھی ریاستی حکومت اپنے طور پر کورونا وائرس کا مقابلہ نہیں کرسکتی ہے۔ انہوں نے مرکزی حکومت سے اپیل کی ہے کہ جلد سے جلد فنڈ جاری کریں۔