بابر پور ضلع کانگریس کمیٹی ایم سی ڈی انتخابات کے لیے پوری طرح تیار

نئی دہلی: بابر پور ضلع کانگریس کمیٹی کی جانب سے ضلع دفتر چوہان بانگر میں پارٹی عہدیداران و کارکنان کی ایک اہم میٹنگ منعقد ہوئی جس کی صدارت ضلع صدر چودھر ی زبیر احمد اور نظامت سید ناصر جاوید نے کی۔ مہمانان خصوصی کی حیثیت سے دہلی پردیش کانگریس کمیٹی کے نائب صدر مدت اگروال، علی مہدی، راجیش گرگ، راجیش یادو اور ارن گرگ نے شرکت کی۔

میٹنگ میں دہلی میونسپل کارپوریشن الیکشن کے پیش نظر خصوصی تبادلہ خیال کیا گیا۔ ساتھ ہی پارٹی کی ڈیجیٹل ممبرشپ مہم میں آنے والی دقتوں اور رکاوٹوں پر باریکی سے غور و خوض کیا گیا اور اس کے سدباب کا طریقہ بھی بتایا گیا۔ ممبرشپ ڈرائیو کے انچارج مدت اگروال نے موجود تمام کارکنان کی باتیں سنیں اور کہا کہ آپ لوگ جو دقتیں بتا رہے ہیں وہ یہاں کے نیٹورک کی دقت ہے، ایپ میں کوئی دقت نہیں ہے۔

مدت اگروال نے کہا کہ یہ بتاتے ہوئے خوشی محسوس کررہا ہوں کہ دہلی کے تمام 14 اضلاع میں بابرپور کی ممبرشپ سرفہرست ہے جس سے اندازہ لگایا جا سکتا ہے کہ ضلع کے صدر کس قدر سرگرم ہیں اور محنت کر رہے ہیں۔ انہوں نے ساتھ ہی کہا کہ یہ جو افواہ اڑائی جا رہی ہے کہ الیکشن میں ابھی بہت وقت لگے گا، یہ باتیں اس لیے کی جا رہی ہیں تاکہ آپ لوگ محنت نہ کر سکیں۔ اس لیے اپنی محنت جاری رکھیں اور جس طرح سے ابھی تک ڈور ٹو ڈور جا کر لوگوں سے ملاقات کر رہے تھے اس سلسلے کو دراز کر دیں کیونکہ الیکشن اپنے وقت پر ہی ہوں گے۔ بی جے پی ایک چالباز پارٹی ہے اس لیے وہ دھوکہ پر رکھ کر تاریخ کا اعلان کروانا چاہتی ہے۔ لہذا آپ لوگ ہمت نہ ہاریں اور تیاری کرتے رہیں۔

اس موقع پر علی مہدی نے کہا کہ اگرچہ ہمیں کئی ریاستوں میں شکست کا سامنا کرنا پڑا مگر وہاں کے مسائل اور دہلی کے مسائل کا زمین و آسمان کا فرق ہے اس لئے وہاں نتیجے سے قطعی مایوس نہ ہوں اور اپنی محنت جاری رکھیں۔ ان شاء اللہ کامیابی ملے گی۔ جس طرح سے ضلع سمیلن میں عوام کی بھیڑ نظر آرہی ہے اس سے ایم سی ڈی میں موجودہ حکومت کے خلاف ناراضگی کا پتہ چلتا ہے اور دوسری طرف ریاستی حکومت کی کئی پالیسیوں سے عوام نالاں ہیں جس کی وجہ سے کانگریس کی طرف لوگوں کا رجحان بڑھ رہا ہے۔

چودھری زبیر احمد نے کہا کہ ہمارے ضلع میں پارٹی کارکنان کے حوصلے بلند ہیں اور پارٹی کے تئیں وفاداری کا مظاہرہ کرتے ہوئے ہر سطح پر محنت کر رہے ہیں جس کے نتیجے میں کانگریس پارٹی کا گراف روز بروز بڑھتا جارہا ہے۔ انہوں نے مزید کہا کہ ہمارے ضلع کے تمام امیدوار محنت کو جار ی رکھے ہوئے ہیں اور جب بھی انتخابات ہوں گے پوری طاقت کے ساتھ لڑیں گے اور کامیاب بھی ہوں گے۔ آج کی میٹنگ کا مقصد تھا کہ ممبرشپ ایپ میں جو دقت تھی وہ دور ہو اور الیکشن پر بھی تبادلہ خیال ہو جس کے لئے ہم نے دہلی کے چار انچارج کو بلایا اور پریشانی دور کرائی۔

ممبر شپ ڈرائیو انچارج راجیش گرگ، راجیش یادو اور ارن گرگ وغیرہ نے بھی تقریب میں اظہار خیال کیا۔ اہم شرکا میں حاجی نصیراحمد، مقصود جمال، جمیل ملک، ریاست ساحل، ہارون ادریسی، خالد خان، ریاض الدین راجو، ضرار احمد، سلیم انصاری، وید پرکاش، مکیش پنچال، سنیل وشسٹھ، شہزاد خان، سنجے گوڑ، نفیس علی، فرقان قریشی، محمد شاہنواز، آشا رانی، نیہا بیگراج، زیب النشا، ممتاز بیگم، شمیم بانو، نور جہاں، سنجے گپتا اور مکیش گوڑ کے نام قابل ذکر ہیں۔