’’اسمبلی انتخابات 2022، بی جے پی کو شکست دینے کا آخری موقع‘‘

لکھنؤ: سماج وادی پارٹی (ایس پی)سربراہ اکھلیش یادو نے نئے سال پر پارٹی کارکنوں سے اپیل کرتے ہوئے کہا ہے کہ سال 2022 کے اسمبلی انتخابات میں بی جے پی کو شکست دینے کے لئے ابھی سے کمر کس لیں، کیونکہ یہ بی جے پی کو شکست دینے کا آخری موقع ہے۔

جمعہ کو پارٹی دفتر میں کارکنوں سے خطاب کرتے ہوئے اکھلیش یادو نے کہا کہ ’’سال 2022 کے انتخابات میں بی جے پی کو شکست دے کر جمہوریت کو بچانے کا آخر ی موقع ہوگا۔ہمیں بی جے پی کے خلاف ہر محاذ پر مقابلہ کرنا ہے۔‘‘ پارٹی کارکنوں و ریاستی عوام کو نئے سال کی مبارب باد پیش کرتے ہوئے سابق وزیر اعلی نے یہ بھی کہا کہ ’’ریاست کے عوام سماج وادی پارٹی کی حمایت کریں گے۔کسان،غریب اور نوجوانوں نے بی جے پی حکومت کی عوام مخالف پالیسیوں سے تنگ آکر ایس پی کا دامن تھاما ہے۔‘‘

سماجوادی پارٹی سربراہ نے بی جے پی حکومت پر کسانوں کو حاشیہ پر لانے کا بھی الزام عائد کیا۔ انھوں نے کہا کہ بی جے پی حکومت نے تین زرعی قوانین لاکر کسانوں کو بالکل کنارہ کر دیا ہے۔اس درمیان اکھلیش یادو نے پارٹی کارکنوں سے کہا کہ وہ عوام کے پاس جائیں اور ماضی میں سماج وادی حکومت کے ذریعہ کرائے گئے کاموں کے بارے میں آگاہ کریں۔