ریاست کے لوگوں کو لگے گا مفت کورونا ٹیکہ، حکومت مہاراشٹر کا اعلان

مہاراشٹر میں کورونا کے معاملات میں مسلسل اضافے کو دیکھتے ہوئے حکومت مہاراشٹر نے ریاست کے تمام شہریوں کو مفت میں کورونا ویکسین فراہم کرنے کا فیصلہ کیا ہے۔ حکومت مہاراشٹر میں اقلیتی امور کے کابینی وزیر اور این سی پی ترجمان نے کہا کہ ریاست میں 18 سے 45 سال کے درمیان کی آبادی کو مفت میں کورونا ویکسین کا ڈوز دیا جائے گا۔ ریاست کی مفت کورونا وائرس مہم کے لئے گلوبل ٹینڈر منگوایا جائے گا، جو کمپنی اچھی اور سستی ویکسین فراہم کرے گی ریاستی حکومت اسی کمپنی سے کورونا ویکسین خریدے گی۔

نواب ملک نے کہا کہ سیرم انسٹی ٹیوٹ نے ریاستی حکومت کو چار سو روپئے میں اور نجی اسپتالوں کو چھ سو روپئے میں ٹیکہ دینے کی بات کہی ہے۔ جبکہ بھارت بائیوٹیک نے مرکز کو ویکسین 150 روپئے میں ریاستی حکومت کو چھ سو روپئے میں نجی اسپتالوں اور عام شہریوں کو بارہ سو روپئے میں ٹیکہ فروخت کرنے کا اعلان کیا ہے۔

نواب ملک نے کہا کہ کورونا ویکسین کے لئے گلوبل ٹینڈر منگوانے کے معاملے کو عملی جامہ پہنانے کے لئے کارروائی شروع کردی گئی ہے۔ نواب ملک نے کہا کہ پچھلی کابینہ میٹنگ میں مفت ٹیکہ کاری مہم کے متعلق تبالہ خیال ہوا تھا، کل ریاست کے نائب وزیراعلیٰ اجیت پوار نے واضح کیا ہے کہ 18 سال سے اوپر ریاست کے تمام شہریوں کو مفت میں کورونا ٹیکہ دیا جائے گا۔

گزشتہ دنوں کئی دنوں سے مہاراشتر میں روزانہ 60 ہزار کورونا کے معاملات سامنے آرہے ہیں گزشتہ 24 گھنٹوں کی اگر بات کی جائے تو ریاست میں 66 ہزار ایک سو 91 نئے معاملات سامنے آئے ہیں اور آٹھ سو 32 افراد کی اموات واقع ہوئی ہے۔ مہاراشٹر کے بگڑتے حالات کو دیکھتے ہوئے حکومتِ مہاراشٹر نے مفت میں کورونا ویکسین کو فراہم کرنے کا فیصلہ کیا ہے۔

نوجونوں کو بھی ویکسین لینے کا مشورہ :

حکومت مہاراشٹر کی جانب سے مفت ویکسین مہم کا ریاست کے عوام نے خیرمقدم کیا ہے۔ ممبئی کے معروف تعلیمی ادارے انجمن اسلام کے صدر اور معروف ریڈیولوجسٹ ڈاکٹر ظہیر قاضی نے کہا ریاستی حکومت کا مفت کورونا ویکسین ڈرائیو کے فیصلے کا قابلِ ستائش ہے۔ ہر فرد کو کورونا کا ٹیکہ لگانا چاہیے، انہوں نے کہا کہ یہ ہماری خام خیالی ہے کہ نوجوانوں کو کورونا ٹیکے کی ضرورت نہیں لیکن حقیقت یہ ہے کہ نوجوانوں کو ویکسین لینا زیادہ ضروری ہے، کیوں کہ نوجوان طبقہ ہی باہر کام پر جاتا ہے۔ اس طبقے کی حفاظت نہایت ضروری ہے۔ ڈاکٹر ظہیر قاضی نے کہا کہ ہر طبقے کو ویکسین لگانا نہایت ضروری ہے۔

مفت ویکسین سے عوام کے بڑے طبقے کو فائدہ ہوگا :

ممبئی کی مسلم ایمبولنس سوسائٹی کے صدر اور ایم ایچ صابو صدیق اسپتال کے سربراہ عبدالراؤف سمار نے بھی ریاستی حکومت کے فری ویکسینیشن ڈرائیو کا خیرمقدم کیا ہے۔ انہوں نے کہا کہ گورنمنٹ کی گائیڈ لائن کے مطابق ہر شخص کو کورونا ویکسین لینا چاہیے۔ ریاستی حکومت کے فیصلے سے عوام کو فائدہ ہوگا اور ویکسین کے منفی اثرات کے بہت کم معاملے سامنے آئیں ہیں۔ لیکن ان باتوں کو دھیان میں نہ لاتے ہوئے ویکسین کو لگانا نہایت ہی ضروری ہے۔

مفت ویکسین کے اعلان کے بعد مزدور طبقے کو راحت :

مفت کورونا ٹیکہ کے اعلان کے بعد ریاست کے مزدور طبقے میں بھی خوشی کی لہر پائی جا رہی ہے۔ مزدور طبقہ بھی حکومت کے اس اعلان سے خوش ہیں۔ مفت ویکسینیشن کا خیرمقدم کیا ہے۔ تعمیرات کا کام کرنے والے ایک مزدور آمین مستری نے کہا کہ مزدور طبقہ کورونا ٹیکے کو لیکر کافی فکر مند تھا لیکن اب ریاستی حکومت کے فری ویکسینیشن کے اعلان کے بعد مزدور طبقہ راحت محسوس کر رہا ہے۔

ویکسین کے متعلق عوام میں اعتماد بحال کرنے کی ضرورت :

مالیگاؤں سے مجلس اتحادالمسلمین کے رکن اسمبلی اور شہر کی جامع مسجد کے خطیب و امام مفتی محمد اسماعیل نے نمائندے سے کہاکہ ریاستی حکومت کی مفت ویکسین کی پالیسی کا ہم خیرم مقدم کرتے ہیں، لیکن ویکسین کے متعلق عوام کے ایک طبقے میں اعتماد کی کمی دیکھائی دے رہی ہے۔ کئی ایسے معاملات سامنے آئیں ہیں کہ ویکسین کے دو ڈوز لینے کے بعد بھی لوگ کورونا مثبت پائے گئے ہیں۔ حکومت کو پہلے ویکسین کی فراہمی سے پہلے عوام میں اس متعلق اعتماد بحال کرنا ہوگا۔

فری ویکسین کے لئے سالانہ ایم ایل اے فنڈ کی پیشکش :

ممبئی کے ممبا دیوی اسمبلی حلقہ سے رکن اسمبلی اور کانگریس لیڈر امین پٹیل نے گزشتہ دنوں وزیراعلیٰ کو مکتوب روانہ کرتے ہوئے ایم ایل اے فنڈ کے ایک کروڑ روپئے سے حلقہ انتخاب کے تمام افراد کو مفت میں کورونا ویکسین فراہم کرنے کا مطالبہ کیا تھا۔ امین پٹیل کا کہنا ہے کہ وہ فری ویکسینیشن کے لئے ایم ایل اے کا پورا سالانہ فنڈ حکومت کو فراہم کرنے کو تیار ہیں، بشرطیکہ حکومت تمام افرد کو مفت میں کورونا کا ٹیکہ فرہم کرے۔