علی گڑھ: اسمارٹ سٹی کے نام پر بے سرو سامان ہوئے دوکاندار، مسجد کو بھی نہیں بخشا

علی گڑھ: شہر میں اسمارٹ سٹی بنائے جانے کے سبب سول لائنس علاقہ میں نگر نگم اور ضلع انتطامیہ کی مشترکہ کاروائی میں سول لائنس علاقہ کا دل کہلانے والے سینٹر پوئنٹ علاقہ کو سب سے پہلے نشانہ بنایا ، جہاں اسٹیشن سے میرس روڈ تک آنے والے اور ٹیکا رام مندر سے رام گھاٹ اترولی جانے والے دونوں جانب کی سڑکوں کے کنارے کنارے بنی ہوئی تمام دوکانوں کو توڑ دیا گیا، ساتھ ہی میرس روڈ چوراہا،دودھ پور چوراہا سمیت کیلا نگر، میڈکل روڈ،جامعہ اردو،ذکریا مارکیٹ ،ایکتا نگر،بیگ پور سمیت پورے سول لائنس علاقہ کو بلڈوزر نے اپنی زد میں لے لیا ، اس درمیان بی جے پی سے جڑے ویاپار منڈل کے عہدیداران نے بلڈوزر کو روکنے کی ناکام کوشش کی اور سڑک پر ہی دھرنے پر بیٹھ گئے ۔

لیکن افسران نے دوکانداروں کی ایک نہ سنی اور دونوں جانب کی دوکانوں پر نشاندہی کرتے ہوئے فوری طور پر دوکانیں اور شو روم خالی کرنے کے احکامات جاری کرتے ہوئے چند گھنٹے کا وقت دیا ، جو دوکاندار اپنی دوکانیں ہٹانے میں نا کام رہے ان کی دوکانوں کو نشانہ بناتے ہوئے بے رحم افسران کا حکم ملتے ہی جلاد بلڈوزر نے دوکانوں کے سامنے کے حصہ کو دیکھتے ہی دیکھتے توڑ دیا دوکاندار اپنی خون پسینے کی کمائی سے بنی اپنی جاگیر کو یوں حسرت سے مٹتے اور ڈھاتے ہوئے دیکھتے رہے۔

انتظامیہ کی اس کاروائی سے ناراض بی جے پی ویاپار منڈل کے عہدیداران نے بی جے پی سے استعفی دینے کی پیش کش بی جے پی شہر صدر کو دے دی ہے وہیں کچھ دوکان مالکان دبی زبان میں یہ بھی کہتے سنے گئے اور دو مودی اور یوگی کو ووٹ، وہیں کچھ دوکاندار یوگی ، مودی مردہ باد کے نعرے لگاتے ہوئے بھی نظر آئے۔دودھ پور و میڈکل روڈ پر واقع مساجد کو بھی سڑک سے پیچھے کئے جانے کے لئے اے ڈی ایم سٹی کی جانب سے کہا گیا ہے دونوں مساجد کی دیواروں کو علاقائی لوگوں کے تعاون سے توڑ کر پیچھے کئے جانے کا کام چل رہا ہے جبکہ جن دوکانداروں کی دوکانیں توڑی گئی ہے وہ اپنے بچے ہوئے حصہ کی مرمت کرانے میں مشغول ہیں۔

کچھ دوکانداروں نے نام نہ شائع کرنے کی شرط کے ساتھ بتایا کہ اسمارٹ سٹی کے نام پر جس طرح سے دوکانوں کو توڑنے کا کام اتنی مستعدی کے ساتھ کیا جا رہا ہے وہ اصل میں بی جے پی کے ایک بڑے لیڈر کے فائیو اسٹار ہوٹل کی میرس روڈپر تعمیر کو لے کر ضلع انتظامیہ کےذریعہ عمل میں لایا جا رہا ہے تاکہ کسی بھی بڑے تاجر یا وی آئی پی کو شہر سے ہوٹل تک آنے میں کوئی پریشانی نہ ہو۔کانگریس پارٹی کے قومی سکریٹری اور سابق ممبر اسمبلی وویک بنسل نے انتطامیہ کی اس جارہانہ کاروائی کی مذمت کرتے ہوئے دوکانداروں سے اپنے غم و غصہ کا اظہار بھی کیا ، ساتھ ہی انہوں نے کہاکہ بی جے پی کی صوبائی و مرکز کی حکومتیں مکمل طور پر مزدور اور عام آدمی کے مخالف کام کرتی رہی ہیں انہوں نے حکومت سے مطالبہ کیا کہ حکومت فوری طور پر دوکانداروں کا استحصال بند کرے انہوں نے کہا کہ عوام سب کچھ دیکھ رہے ہیں اور وقت آنے پر بی جے پی کو سبق سکھانے میں پیچھے نہیں رہیں گے۔

شاندار رونق اور اپنی بے مثال چہل پہل کے لئے مشہور پوراسول لائنس علاقہ اب ویرانگی کی حالت کو پہنچ چکا ہے آج دھول اور کھنڈہر جیسی حالت کا شکار یہ علاقہ گذشتہ 50 برس کی طویل مدت سے شہر بھر کی ضرورتوں کو پورا کر رہا تھا۔یہاں آنے والے کی زبان پر بس ایک ہی شعر ہے۔

کل چمن تھا آج یہ سحرا ہوا، دیکھتے ہی دیکھتے یہ کیا ہوا