مودی کو اس بار صفر کر دے گی عوام: اکھلیش

وزیر اعظم نریندر مودی اترپردیش میں ہیں، اس دوران وہ عوامی جلسوں سے خطاب کر کے حزب اختلاف کو نشانہ بنا رہے ہیں۔ دریں اثنا ریاست کے سابق وزیر اعلیٰ اور سماجوادی پارٹی کے صدر اکھلیش یادو نے بغیر نام لئے ان پر حملہ کیا ہے۔

اکھلیش نے ٹوئٹ میں لکھا، ’’ضمنی انتخابات میں ملی منہ توڑ شکست اور آئندہ انتخابات میں ہونے والی ہار کے ڈر سے ملک کے اعلیٰ عہدوں پر بیٹھے لوگ اپنے جلسوں میں غلط بیانیاں کر کے عوام کو گمراہ کررہے ہیں۔‘‘

اکھلیش یادو نے اشاروں اشاروں میں وزیر اعظم مودی پر نشانہ لگاتے ہوئے مزید کہا ’’اب عوام ان کے سراب اور جھوٹ کو پہچان گئے ہیں۔ ایسے بیانات ان کے اندر کی بے چینی کو ظاہر کر رہے ہیں۔ اس بار یو پی ان کو صفر کر دے گا۔‘‘

اس سے قبل پوروانچل ایکسپریس وے کا افتتاح کرنے پہنچے وزیر اعظم نریندر مودی نے بغیر نام لئے سماجوادی پارٹی پر نشانہ سادھا تھا۔ انہوں نے کہا تھا کہ کچھ لوگ خاندان کی سیاست کر رہے ہیں۔‘‘