جہانگیر پوری تجاوزات ہٹاؤ مہم: بلڈوزر کارروائی پر کانگریس نے مودی حکومت کو بنایا نشانہ

سپریم کورٹ کے حکم کے باوجود بدھ کے روز دہلی کے جہانگیر پوری میں ایم سی ڈی کی کارروائی کافی دیر تک جاری رہی۔ اس سلسلے میں کانگریس نے مرکز کی مودی حکومت کو تنقید کا نشانہ بنایا ہے۔ کانگریس نے جہانگیر پوری میں بلڈوزر کی کارروائی کو سپریم کورٹ کے حکم کی خلاف ورزی قرار دیا ہے۔ ساتھ ہی کانگریس نے اروناچل پردیش اور لداخ میں چینی تجاوزات کے خلاف بھی اسی طرح کی کارروائی کرنے کو کہا۔

کانگریس ترجمان جئے ویر شیرگل نے کہا کہ سپریم کورٹ کے حکم کے بعد بھی جہانگیر پوری میں کارروائی جاری رکھی گئی۔ یہ ایک خطرناک مثال ہے۔ ہمارے آئین کی خاطر قانون کے وقار کو بنائے رکھنے کے لیے عدالت کو سخت قدم اٹھانا ہوگا۔

واضح رہے کہ سینئر وکیل دشینت دَوے نے بدھ کے روز چیف جسٹس این وی رمنا کی صدارت والی بنچ کے سامنے جہانگیر پوری میں تجاوزات اور غیر قانونی تعمیرات کے خلاف ایم سی ڈی کی کارروائی کا معاملہ اٹھایا۔ انھوں نے کہا کہ عدالت عظمیٰ کے حکم کے باوجود میونسپل کارپوریشن نے اپنی کارروائی نہیں روکی۔ انھوں نے عدالت عظمیٰ سے گزارش کی کہ وہ جنرل سکریٹری کو شمالی دہلی میونسپل کارپوریشن (این ڈی ایم سی)، میئر این ڈی ایم سی اور دہلی پولیس کمشنر کو عدالتی حکم کے بارے میں بتانے کے لیے کہیں۔ دَوے نے کہا کہ یہ جانتے ہوئے کہ عدالت عظمیٰ نے بلڈوزر کی کارروائی کو روک دیا ہے، باوجود اس کے وہ نہیں رکے، اس سے غلط پیغام جاتا ہے۔