پارلیمنٹ کی ایک تقریر میرا اصل گناہ: اعظم خان

رامپور: 80 سے زیادہ معاملوں میں زائد از دو سال کی جیل کی سزا کاٹنے کے بعد ضمانت پر باہر آئے ایس پی لیڈر اعظم خان نے کہا ہے کہ انہیں جیل بھیجنے جانے کی اصل وجہ پارلیمنٹ میں ان کے ذریعہ کی گئی ایک تقریر ہے۔ اعظم خان نے رامپور لوک سبھا سیٹ پر ہو رہے ضمنی الیکشن میں ایس پی (سماجوادی پارٹی) امیدوار کی حمایت میں دیر رات ایک ریلی سے خطاب کرتے ہوئے کہا کہ لوک سبھا میں انہوں نے ایک تقریر کی تھی اس کی کچھ باتوں سے خفا ہو کر حکومت نے ان کے خلاف تمام معاملے درج کراکر اتنے دنوں تک انہیں جیل میں رکھا۔

ایس پی کے سینئر رہنما نے کہا کہ ’’شاید پارلیمنٹ میں کی گئی ایک تقریر میری اس ہراسانی و قید بند کی اصل سبب بنی، جس میں میں نے دعوی کیا تھا کہ رامپور کی جوہر یونیورسٹی کے میڈیکل کالج میں 8 آپریشن تھیٹر ہیں۔ نیویارک میں بھی اس سے اچھا آپریشن تھیٹر نہیں ہوگا۔ جو کہ آج بند پڑا ہے اور سامان چوری ہو گیا ہے۔ یہ کس کا نقصان ہوا۔ یہ پورے ملک کے لئے قومی نقصان ہے۔ انہوں نے کہا کہ میں اس کی شکایت ملک کے وزیر اعظم اور وزیر داخلہ سے کرنا چاہتا ہوں۔

اس دوران انہوں نے رامپور کے نواب خاندان پر بھی طنز کسا اور کہا نواب زادہ کی نواب کہلانے والی اولادوں کو خواجہ سراوؤں کا ووٹ بھی نہیں ملا۔ اعظم خان نے کہا کہ رام پور کے نواب زادہ ذوالفقار علی خان کی اولادیں اپنے آپ کو نواب کہتی ہیں اور صرف 3 ہزار ووٹ پاتی ہیں۔ اس سے زیادہ تو رامپور میں خواجہ سرا ہوں گے۔ اس سے صاف ہے کہ نواب صاحب کو تو خواجہ سراؤں کا ووٹ بھی نہیں ملا۔

انہوں نے نواب خاندان پر تنقیدوں کے نشتر چلاتے ہوئے کہا ’’حامد منزل میں ایک طرف رقاصائیں رقص کرتی تھیں اور ایک طرف ہمارا نواب رقص کرتا تھا۔ طوائف بیہوش ہوکر گر جاتی تھی، ہمارا نواب پھر بھی رقص کرتا رہتا تھا۔ کسی نے نہیں بتائی ہوں گی آپ کو یہ باتیں۔ یہی ہمارا گناہ ہے۔‘‘