مہاراشٹر میں 5 سی آئی ایس ایف جوان ’کورونا پازیٹو‘، علاج جاری

کورونا وائرس کے قہر سے نبردآزما مہاراشٹر میں انفیکشن لگاتار بڑھتا ہی جا رہا ہے اور کورونا کے مریضوں کی تعداد 350 کے قریب پہنچ گئی ہے۔ اس مہلک وبا کی زد میں اب سی آئی ایس ایف کے پانچ جوان بھی آ گئے ہیں۔ میڈیا ذرائع سے موصول ہو رہی خبروں کے مطابق مہاراشٹر میں سی آئی ایس ایف کے پانچ جوانوں کا کورونا ٹیسٹ پازیٹو آیا ہے جس کے بعد انھیں سخت نگرانی میں رکھا گیا ہے۔ سبھی جوانوں کا علاج جاری ہے اور ان کی حالت مستحکم بتائی جا رہی ہے۔

قابل ذکر ہے کہ سی آئی ایس ایف کے پانچ جوانوں میں کورونا وائرس کی تصدیق سے قبل ممبئی کے سی ایس ٹی ریلوے پولس اسٹیشن کے ایک کانسٹیبل میں بھی کورونا انفیکشن پایا گیا تھا۔ ریلوے پولس کے اس کانسٹیبل کو 30 مارچ کو کلیان کے رکمنی بائی اسپتال سے کستوربا اسپتال میں منتقل کیا گیا تھا جہاں کورونا ٹیسٹ کرائے جانے پر ریزلٹ پازیٹو آیا۔ اس کانسٹیبل کا علاج بھی فی الحال جاری ہے۔

واضح رہے کہ مہاراشٹر میں کورونا وائرس کے انفیکشن کو روکنے کے لیے ریاستی حکومت و انتظامیہ ہر ممکن کوشش کر رہی ہے لیکن کورونا کا قہر لگاتار بڑھتا ہی جا رہا ہے۔ بدھ کے روز ریاست میں کل 7 لوگ اس وائرس کی وجہ سے موت کی نیند سو گئے۔ صرف ممبئی میں ہی 5 لوگوں نے بدھ کے روز اس وائرس کی زد میں آنے کے بعد داعی اجل کو لبیک کہا۔