سو کروڑ وصولی معاملہ: مہاراشٹر کے سابق وزیر داخلہ انیل دیشمکھ سی بی آئی کی حراست میں

ممبئی: مہاراشٹر کے سابق وزیر داخلہ انیل دیشمکھ کو سی بی آئی نے اپنی حراست میں لے لیا ہے۔ آرتھر روڈ جیل کے افسران نے یہ اطلاع فراہم کرتے ہوئے اے بی پی نیوز کو بتایا کہ انیل دیشمکھ کو ایک گھنٹے پہلی ہی سی بی آئی اہلکار اپنے ساتھ لے کر گئے ہیں۔ اس سے قبل وہ ای ڈی کی تحویل میں تھے۔

انیل دیشمکھ ابھی تک ای ڈی کی تحویل میں تھے اور سیشن عدالت نے انہیں سی بی آئی کی تحویل میں دینے کا حکم جاری کیا تھا۔ اسی حکم کو چیلنج کرتے ہوئے انیل دیشمکھ نے ہائی کورٹ سے رجوع کیا تھا۔ انیل دیشمکھ کے وکیل جسٹس پرکاش نائیک کی بنچ کے سامنے اپنی عرضی کی سماعت کئے جانے کی درخواست کریں گے۔

خیال رہے کہ انیل دیشمکھ پر مبینہ ٹرانسفر پوسٹنگ اور بار ریسٹورینٹ سے غیر قانونی وصولی کرنے کا الزام ہے۔ یہ الزام سابق پولیس کمشنر پرمبیر سنگھ نے عائد کیا تھا۔ اس کے بعد سنگھ نے ہائی کورٹ کا دروازہ کھٹکھٹایا تھا۔ دریں اثنا، وکیل جے شری پاٹل نے بھی عدالت میں عرضی داخل کر کے پرمبیر سنگھ کے الزامات کی جانچ کا مطالبہ کیا تھا۔

اس سب کے بعد عدالت نے اس معاملہ کی تحقیقات کی ہدایت سی بی آئی کو دی تھی اور کہا تھا کہ جانچ کے دوران اگر انہیں محسوس ہو کہ معاملہ درج کر سکتے ہیں تو کریں۔ اس کے بعد سی بی آی نے انیل دیشمکھ سمیت کئی دیگر افراد کے خلاف معاملہ درج کیا۔