دہلی شراب گھوٹالہ میں 100 کروڑ کی رشوت دی گئی، ای ڈی کا دعویٰ

نئی دہلی: انفورسمنٹ ڈائریکٹوریٹ (ای ڈی) نے جمعرات کو دعویٰ کیا کہ دہلی میں نئی ​​شراب فروخت پالیسی (جو اب ختم ہو چکی ہے) سے متعلق ایک معاملے میں 100 کروڑ روپے کی رشوت دی گئی تھی، جس میں نائب وزیر اعلیٰ منیش سسودیا ایک ملزم ہیں۔ ایجنسی نے دعویٰ کیا کہ سسودیا سمیت تین درجن سے زیادہ وی آئی پیز نے مبینہ طور پر 140 موبائل فون تبدیل کئے تاکہ ڈیجیٹل ثبوت ختم کئے جا سکیں۔ سسودیا جنہیں ایجنسی اور سی بی آئی کے ذریعہ اس معاملے میں متعدد چھاپوں کا نشانہ بنایا گیا تھا، نے کسی بھی غلط کام سے انکار کیا اور کہا کہ یہ الزامات سیاسی طور پر محرک تھے۔ ان کا کہنا ہے کہ چھاپوں میں ان کے خلاف کچھ نہیں ملا۔

وہیں، دہلی کے وزیر اعلی اروند کیجریوال نے سسودیا کی حمایت کرتے ہوئے کہا ہے کہ مرکز میں بی جے پی کی قیادت والی حکومت اگلے ماہ گجرات میں ہونے والے انتخابات سے قبل عام آدمی پارٹی (اے اے پی) کے رہنماؤں کو نشانہ بنا رہی ہے اور تحقیقاتی اداروں کا غلط استعمال ہو رہا ہے۔

انفورسمنٹ ڈائریکٹوریٹ نے شراب کی فروخت کی پالیسی سے متعلق ایک معاملے میں جمعرات کو دو نجی کمپنیوں کے دو اہلکاروں کو گرفتار کرنے کے بعد یہ دعویٰ کیا ہے۔ گرفتار کیے گئے دو افراد میں شراب کمپنی پرنوڈ رکارڈ کے جنرل منیجر بنوئے بابو اور اوروبندو فارما کے کل وقتی ڈائریکٹر اور پروموٹر پی سرت چندر ریڈی شامل ہیں۔ انہیں آدھی رات کے کچھ دیر بعد حراست میں لیا گیا۔ حکام نے بتایا ایجنسی نے بعد میں انہیں دہلی کی ایک خصوصی عدالت میں پیش کیا اور انہیں سات 7 کے لیے انفورسمنٹ ڈائریکٹوریٹ کی تحویل میں بھیج دیا۔

ایجنسی نے عدالت کو بتایا کہ ریڈی نے تقریباً 100 کروڑ روپے رشوت کے لیے جمع کیے جو سیاسی رہنماؤں اور عہدیداروں کو دیے گئے تھے۔ حکام نے الزام لگایا کہ دونوں گرفتار افسران تفتیش کے دوران منہ موڑ رہے تھے۔ ایجنسی نے یہ بھی دعویٰ کیا کہ اس نے یہ بھی پایا کہ خوردہ شراب کے کاروبار میں 200 کروڑ روپے کی سرمایہ کاری پالیسی ہدایات کی خلاف ورزی کرتے ہوئے ایک ادارے نے کی تھی۔

خیال رہے کہ انفورسمنٹ ڈائریکٹور کا منی لانڈرنگ کیس سی بی آئی کی ایف آئی آر سے نکلا ہے، جس میں منیش سسودیا اور دیگر کو ملزم بنایا گیا تھا۔ دہلی کے لیفٹیننٹ گورنر کی طرف سے دہلی ایکسائز پالیسی 2021-22 کے نفاذ میں مبینہ بے ضابطگیوں کی سی بی آئی انکوائری کی سفارش کے بعد ایکسائز اسکیم کی جانچ پڑتال کی گئی۔ اس معاملے میں لیفٹیننٹ گورنر نے ایکسائز کے 11 افسران کو بھی معطل کر دیا تھا۔ ای ڈی نے اس معاملے میں اے اے پی کے ایم ایل اے درگیش پاٹھک سے اور منی لانڈرنگ کے ایک اور معاملے میں وزیر ستیندر جین سے پوچھ گچھ کی ہے۔ سی بی آئی نے اس معاملے میں دو لوگوں کو گرفتار کیا ہے۔