IPL: حیدرآباد پر کولکاتا کی آسان فتح، 18 اوور میں ہی بنا لیے 145 رن

حیدر آباد نے کولکاتا کو جیت کے لیے 143 رنوں کا ہدف دیا تھا جسے دنیش کارتک کی کپتانی والی ٹیم نے 18 اوور میں ہی حاصل کر لیا۔ کولکاتا کی جانب سے شبھمن گل نے ناٹ آؤٹ 70 رن اور ایان مورگن نے ناٹ آؤٹ 42 رنوں کی بہترین اننگ کھیلی۔ حیدر آباد کی جانب سے کوئی بھی گیندباز خاص کارکردگی نہیں دکھا سکا۔ راشد خان نے 4 اوور میں 5 رن دے کر ایک وکٹ لیا اور ایک ایک وکٹ نٹراجن و خلیل احمد کو حاصل ہوا۔

کولکاتا دھیرے دھیرے فتح کی طرف گامزن ہے۔ 14 اوور میں اس نے 102 رن بنا لیے ہیں اور اس کے محض 3 وکٹ آؤٹ ہوئے ہیں۔ شبھمن گل نے نصف سنچری مکمل کر لی ہے اور وہ میدان میں موجود ہیں۔ ان کے ساتھ ایان مورگن 17 رن پر بلے بازی کر رہے ہیں۔ حیدر آباد کے گیندباز ان دونوں بلے بازوں کو پریشانی میں ڈالتے ہوئے نظر نہیں آ رہے ہیں اور اگر جلدی کچھ وکٹ نہیں گرے تو حیدر آباد یہ میچ بہ آسانی ہار جائے گی۔

حیدر آباد کے خلاف اس وقت کولکاتا مضبوط حالت میں دکھائی دے رہی ہے۔ 12 اوور کے بعد کولکاتا نے 3 وکٹ کے نقصان پر 89 رن بنا لیے ہیں اور شبھمن گل نصف سنچری کے قریب ہیں۔ وہ اچھی بلے بازی کر رہے ہیں اور دوسری طرف ایان مورگن بھی سنبھل کر کھیل رہے ہیں۔ کولکاتا کو 8 اوور میں جیت کے لیے 54 رنوں کی ضرورت ہے۔ اگر حیدر آباد کو میچ جیتنا ہے تو اسے جلدی جلدی کچھ وکٹیں گرانی ہوں گی۔

کولکاتا کو تیسرا جھٹکا لگ گیا ہے اور راشد خان نے اپنے پہلے ہی اوور میں دنیش کارتک کو آؤٹ کرنے میں کامیاب ہوئے۔ 8 اوور میں کولکاتا نے 60 رن بنا لیے ہیں اور اسے جیت کے لیے 12 اوور میں 83 رن چاہیے۔

حیدر آباد نے کولکاتا کو دوسرا جھٹکا دیتے ہوئے تیز بلے بازی کر رہے نتیش رانا کو پویلین بھیج دیا ہے۔ رانا کو نٹراجن نے ردھیمان ساہا کے ہاتھوں کیچ آؤٹ کرایا۔ کولکاتا کے لیے اچھی بات یہ ہے کہ اس کا رَن ریٹ کافی اچھا ہے اور اب اسے جیت کے لیے 15 اوور میں 100 رنوں کی ضرورت ہے۔ اگر حیدر آباد کو جیت حاصل کرنا ہے تو اسے جلدی جلدی مزید کچھ وکٹ گرانے ہوں گے۔

کولکاتا کو دوسرے اوور میں ہی پہلا جھٹکا سنیل نرائن کی شکل میں لگ گیا ہے۔ حیدر آباد کے تیز گیندباز خلیل احمد نے سنیل نارائن کو بغیر کوئی رن بنائے پویلین بھیج دیا۔

حیدر آباد نے کولکاتا کے خلاف 20 اووروں میں 4 وکٹ کے نقصان پر 142 رن بنائے ہیں۔ گویا کہ کولکاتا کو آئی پی ایل 2020 میں پہلی جیت حاصل کرنے کے لیے 143 رن بنانے ہوں گے اور اگر حیدر آباد کو 2 پوائنٹ چاہیے تو بہترین گیندبازی کا مظاہرہ کر کے انھیں 143 رن بنانے سے روکنا ہوگا۔ بہر حال، حیدر آباد کی جانب سے سب سے اچھی بلے بازی منیش پانڈے نے 51 رن بنا کر کی اور کولکاتا کی جانب سے پیٹ کمنس نے سب سے اچھی گیندبازی کی جنھوں نے 4 اوور میں 19 رن دے کر ایک وکٹ لیا۔

حیدر آباد کا تیسرا وکٹ گر گیا ہے۔ آندرے رسل نے اپنے پہلے اوور کی چوتھی گیند پر منیش پانڈے کو آؤٹ کر دیا ہے جنھوں نے 38 گیندوں میں 51 رن بنائے۔ اس وقت 17.4 اوور ہو چکے ہیں اور حیدر آباد کا اسکور 3 وکٹ کے نقصان پر 121 رن ہے۔ کولکاتا کے گیندبازوں نے اچھی گیندبازی کا مظاہرہ کیا ہے جس کی وجہ سے حیدر آباد کے بلے باز تیزی کے ساتھ رن نہیں بنا سکے۔

کولکاتا نائٹ رائیڈرس کے خلاف حیدر آباد کے بلے باز کھل نہیں کھیل پا رہے ہیں۔ 13 اوور ہو چکا ہے اور ابھی تک محض 82 رن بنے ہیں، حالانکہ اس کے دو ہی کھلاڑی آؤٹ ہوئے ہیں۔ کولکاتا کی گیندبازی کافی اچھی نظر آ رہی ہے اور کچھ اوورس کو چھوڑ دیا جائے تو حیدر آباد کے بلے بازوں کے لیے رن بنانا مشکل ہو رہا ہے۔

کولکاتا کے خلاف حیدر آباد کی حالت بہت اچھی نظر نہیں آ رہی ہے۔ حیدر آباد کے کپتان ڈیوڈ وارنر 30 گیندوں میں 36 رن بنا کر ورون چکرورتی کی گیند پر آؤٹ ہو گئے ہیں اور یہ ٹیم کے لیے دوسرا جھٹکا ہے۔ پہلے بیرسٹو 5 رن بنا کر آؤٹ ہوئے تھے۔ اس وقت حیدر آباد کا اسکور 9.1 اور میں 59 رن ہے۔ اس طرح دیکھا جائے تو کولکاتا نے حیدر آباد کے بلے بازوں کو کھل کر کھیلنے کا موقع نہیں دیا ہے۔

کولکاتا نائٹ رائیڈرس کے تیز گیندباز پیٹ کمنس نے ٹیم کو پہلی کامیابی دلاتے ہوئے خطرناک بلے باز بیرسٹو کو پویلین بھیج دیا ہے۔ بیرسٹو 10 گیندوں پر محض 5 رن بنا سکے۔ اس وقت حیدر آباد کا اسکور 4 اوور کے بعد ایک وکٹ کے نقصان پر 24 رن ہے۔

حیدر آباد کے سلامی بلے باز ڈیوڈ وارنر اور بیرسٹو نے کولکاتا کے خلاف سنبھل کر کھیلنا شروع کیا ہے۔ شروعاتی دو اوور میں محض 2 رن بنے ہیں۔ سنیل نارائن کے پہلے اوور میں 6 رن بنے اور پیٹ کمنس کے پہلے اوور میں محض 2 دو رن بنے۔

سنرائزرس حیدرآباد کے کپتان ڈیوڈ وارنر نے ٹاس جیت کر کولکاتا نائٹ رائیڈرس کے کپتان دنیش کارتک کو گیندبازی کے لیے کہا ہے۔ چونکہ گزشتہ کچھ میچوں سے پہلے بلے بازی کرنے والی ٹیم ہی فتحیاب ہوئی ہے، اس لیے ڈیوڈ وارنر نے ٹاس جیت کر بلے بازی کا فیصلہ کیا۔

آئی پی ایل 2020 کے آٹھویں میچ میں آج مقابلہ کولکاتا نائٹ رائیڈرس (کے کے آر) اور سنرائزرس حیدر آباد (ایس آر ایچ) کے درمیان ہے۔ دونوں ہی ٹیمیں اپنا اپنا پہلا میچ ہار چکی ہیں اور اس میچ میں جیت حاصل کر 2 پوائنٹ حاصل کرنا چاہتی ہیں۔