بنگلور بمقابلہ حیدرآباد LIVE: وراٹ کی ٹیم نے وارنر کی ٹیم کو 10 رنوں سے دی شکست

بہترین شروعات کے بعد یکے بعد دیگرے وکٹ گرتے رہنے سے حیدر آباد کی ٹیم بنگلور کے ذریعہ دیے گئے 164 رن کے ہدف کو حاصل نہیں کر سکی۔ وراٹ کوہلی کے گیندبازوں نے آخر میں بہترین گیندبازی کا مظاہرہ کیا جس کی وجہ سے لگاتار وکٹ گرتے رہے اور 19.4 اوور میں اس کے سبھی کھلاڑی 153 رن بنا کر آؤٹ ہو گئے۔ اس طرح سے وراٹ کوہلی کی ٹیم کو پہلے میچ میں 10 رن سے فتحیابی حاصل ہوئی ہے۔

18ویں اوور میں بنگلور کی تیز گیندباز نودیپ سینی نے دو وکٹ لے کر حیدر آباد کے لیے مشکلات میں مزید اضافہ کر دیا ہے۔ بھونیشور کمار اور راشد خان کے آؤٹ ہونے کے بعد اب حیدر آباد کے پاس صرف دو وکٹ بچے ہیں اور دو اوور میں 10 سے زیادہ کی اوسط سے رن بنانے ہیں۔

حیدر آباد ٹیم کی لگاتار وکٹیں گر رہی ہیں۔ بیرسٹو کے بعد وجے شنکر آؤٹ ہوئے اور پھر پریم گرگ غلط شاٹ کھیل کر شیوم دوبے کی گیند پر پلے ڈاؤن ہو گئے اور پھر دو رن لینے کی کوشش میں ابھشیک شرما اور راشد خان پیچ کے درمیان میں ٹکرا کر گر گئے جس کی وجہ سے ابھشیک شرما آؤٹ ہو گئے۔ اس طرح سے حیدر آباد کے پاس اب 4 وکٹ ہیں اور 3 اوور میں 29 رن بنانے ہیں۔

حیدر آباد کے لیے چہل نے مشکلات پیدا کر دی ہیں۔ جانی بیرسٹو کے بعد وجے شنکر کو ان کی پہلی ہی گیند پر یجویندر چہل نے آؤٹ کر دیا۔ اس وکٹ کے گرنے سے آر سی بی کے کپتان وراٹ کوہلی کافی خوش نظر آ رہے ہیں۔

آر سی بی گیندباز یجویندر چہل نے خطرناک نظر آ رہے جانی بیرسٹو کو 61 رن پر پویلین لوٹا دیا ہے۔ بیرسٹو کے آؤٹ ہونے کے بعد مقابلہ دلچسپ ہو گیا ہے۔ اب آر سی بی جلد کچھ مزید وکٹیں حاصل کر اس میچ پر اپنی گرفت بنانے کی کوشش کرے گی۔

حیدر آباد کے سلامی بلے باز جانی بیرسٹو نے 14ویں اوور کی تیسری گیند پر چوکا لگا کر اپنی نصف سنچری مکمل کر لی ہے اور اس کے ساتھ ہی ٹیم کے بھی 100 رن مکمل ہو گئے ہیں۔ یہ نصف سنچری بیرسٹو نے محض 37 گیند میں مکمل کی۔ اس وقت حیدر آباد نے 14 اوور میں 2 وکٹ کے نقصان پر 108 رن بنا لیے ہیں۔ گویا کہ حیدر آباد کو جیت کے لیے 6 اوور میں 56 رن چاہیے اور اس کے ہاتھ میں 8 وکٹ محفوظ ہیں۔

اچھی بلے بازی کر رہے منیش پانڈے 34 رن بنا کر آؤٹ ہو گئے ہیں۔ حیدر آباد کو یہ دوسرا جھٹکا لگا ہے۔ منیش پانڈے کو یجویندر چہل نے نودیپ سینی کے ہاتھوں کیچ کرایا۔ اس وقت حیدر آباد کا اسکور 12 اوور میں 89 رن ہے۔ دوسری طرف جانی بیرسٹو نصف سنچری کے قریب پہنچ گئے ہیں۔

بنگلور کو شکست دینے کے لیے 164 رن کا پیچھا کرنے لیے اترے حیدر آباد کے کپتان ڈیوڈ وارنر محض 6 رن پر آؤٹ ہو گئے تھے، لیکن اس کے بعد سلامی بلے باز بیرسٹو اور منیش پانڈے نے مل کر پاری کو سنبھال لیا ہے۔ 10 اوور میں 78 رن بن گئے ہیں اور اب مزید 86 رنوں کی درکار ہے۔ چونکہ ابھی تک محض ایک وکٹ گرا ہے اس لیے حیدر آباد کے لیے جیت کے امکانات روشن ہیں۔ جانی بیرسٹو 39 اور منیش پانڈے 31 رن بنا کر کھیل رہے ہیں۔

پڈکل کی بہترین نصف سنچری (56 رن) کے بعد آخر میں اے بی ڈیویلیرس کے ذریعہ بنائے گئے تیز طرار 51 رن کی بدولت آر سی بی نے حیدر آباد کے سامنے جیت کے لیے 164 رن کا ہدف دیا ہے۔ آر سی بی نے 20 اوورس میں 5 وکٹ کے نقصان پر 163 رن بنائے۔ وراٹ کوہلی نے 14 رن کا تعاون دیا جب کہ فنچ نے 29 رن بنائے۔ شیوم دوبے 7 رن بنا کر آؤٹ ہوئے اور 1 رن پر ناٹ آؤٹ رہے۔

آر سی بی کے کپتان وراٹ کوہلی سے دھماکہ دار بلے بازی کی امید کر رہے لوگوں کو امیدوں پر پانی پھر گیا ہے۔ وراٹ محض 14 رن بنا کر نٹراجن کا شکار ہو گئے ہیں۔ وراٹ کا کیچ راشد خان نے لیا۔ اس وقت آر سی بی کا اسکور 15.5 اوور میں 3 وکٹ کے نقصان پر 123 رن ہے۔

دونوں اوپنر بلے بازوں کے آؤٹ ہونے کے بعد کپتان وراٹ کوہلی اور اے بی ڈیویلیرس میدان پر آئے ہیں اور دونوں نے سنبھل کر کھیلنا شروع کر دیا ہے۔ اس کی وجہ سے رَن ریٹ کچھ نیچے ضرور چلا گیا ہے لیکن 15 اوور کے بعد 116 رن بن چکے ہیں۔ اگلے 5 اوور میں لوگ وراٹ کوہلی اور اے بی ڈیویلیرس سے بڑے شاٹ کا انتظار کر رہے ہیں۔

آر سی بی یعنی بنگلور ٹیم کو بہترین شروعات دینے کے بعد دونوں اوپنر پڈکل اور فنچ آؤٹ ہو گئے ہیں۔ پہلے تو پڈکل بہترین 56 رن بنا کر شنکر کی گیند پر بولڈ ہوئے، اور اس کے بعد اگلے اوور کی پہلی ہی گیند پر فنچ ابھشیک شرما کی گیند پر ایل بی ڈبلیو آؤٹ ہو گئے۔

شروع کے دو اووروں میں کچھ دھیمی شروعات کرنے کے بعد بنگلورو کے اوپنر بلے بازوں پڈکل اور فنچ نے تیزی کے ساتھ بلے بازی کرنا شروع کر دی ہے۔ اس وقت بنگلورو کے 10 اوور میں 86 رن بن گئے ہیں۔ قابل ذکر بات یہ ہے کہ محض 36 گیندوں پر پڈکل نے اپنی نصف سنچری مکمل کر لی ہے۔ پڈکل کافی تیز کھیل رہے ہیں جب کہ فنچ زیادہ سے زیادہ اسٹرائک پڈکل کو دینے کی کوشش کر رہے ہیں۔

بنگلور کے دیو دت پڈکل نے آتشی بلے بازی کا نظارہ پیش کرنا شروع کر دیا ہے۔ جہاں 2 اوور میں محض 13 رن بنے تھے اب 4 اوور میں 32 رن بن گئے ہیں۔ دلچسپ بات یہ ہے کہ تنہا پڈکل نے 29 رن بنائے ہیں۔ بنگلور کا کوئی وکٹ ابھی تک آؤٹ نہیں ہوا ہے۔

پڈکل اور فنچ نے آر سی بی کو دھیمی شروعات دی ہے۔ دو اوور میں محض 13 رن بنے ہیں، لیکن اچھی بات یہ ہے کہ آر سی بی کا کوئی وکٹ نہیں گرا ہے۔ پڈکل نے 12 رن بنائے ہیں جب کہ ایک رن ایکسٹرا ہے۔

وراٹ کی ٹیم بلے بازی کے لیے تیار ہے اور ایرون فنچ کے ساتھ دیودت پڈکل اوپننگ کے لیے میدان میں اترے ہیں۔ ایس آر ایچ کی طرف سے گیندباز کی شروعات بھونیشور کمار کر رہے ہیں۔

آج آئی پی ایل 2020 کے تیسرے مقابلے میں رائل چیلنجرس بنگلور (آر سی بی) اور سنرائزرس حیدر آباد (ایس آر ایچ) کے درمیان مقابلہ ہے۔ حیدر آباد کے کپتان ڈیوڈ وارنر نے ٹاس جیت کر پہلے گیندبازی کا فیصلہ کیا ہے۔ یعنی وراٹ کوہلی کی ٹیم پہلے بلے بازی کرنے اترے گی۔ کافی دنوں کے بعد وراٹ کو بلے بازی کرتے ہوئے دیکھنا کافی اچھا رہے گا اور دیکھنے والی بات یہ بھی ہوگی کہ وراٹ کے ساتھی اے بی ڈیویلیرس بلے بازی کیا کمال دکھاتے ہیں۔