ملتوی نہیں ہوں گے امریکہ میں صدارتی انتخابات، 3 نومبر کو ہی ڈالے جائیں گے ووٹ

واشنگٹن: امریکہ میں آئندہ صدارتی انتخاب طے شدہ نطام الاوقات کے مطابق اسی سال تین نومبر کو ہوگا۔ اس کی تصدیق نہ صرف وائٹ ہاؤس نے کی ہے بلکہ موجودہ صدر ڈونالڈ ٹرمپ کی انتخابی مہم چلانے والوں نے بھی صدارتی انتخاب میں کسی قسم کی تاخیر کے کسی بھی اندیشے کو مسترد کیا ہے۔ اس طرح کی وضاحتوں کو سیاسی حلقوں میں انتخابات کے التوا کی کسی بھی تجویز کے اثرات کو کمزور کرنے کی کوشش ہے۔ ویسے امریکی آئین کے تحت الیکشن کی تاریخ میں تبدیلی کا اختیار کلی طور پر کانگریس کو حاصل ہے۔

قبل ازیں صدر ڈونالڈ ٹرمپ نے پچھلے ہفتے جمعرات کو ایک ٹوئٹ میں ڈاک سے ڈالے جانے والے ووٹوں پر تحفظات کا اظہار کرتے ہوئے کہا تھا کہ کرونا کی وبا کے باعث انتخابات ملتوی کرنے پر غور کرنا چاہیے۔ صدر کے اس تجویز نما بیان کو کانگریس میں ڈیموکریٹ اور ری پبلکن دونوں جماعتوں کے قائدین نے فوراً ہی مسترد کر دیا تھا۔ ہر چند کہ کانگریس کے رہنماؤں نے صدر کی متعلقہ تجویز مسترد کردی ہے، باوجود اس کہ امریکہ کے سیاسی حلقوں اور ذرائع ابلاغ میں صدر کا متعلقہ بیان بدستور زیر بحث ہے۔

وائٹ ہاؤس کے چیف آف اسٹاف مارک میڈوز نے ایک ٹیلی پروگرام میں کل کہا تھا کہ انتخاب ملتوی کرنے کے تعلق سے ٹرمپ کا اصل مقصد ڈاک سے ڈالے جانے والے ووٹوں پر اپنے تحفظات کا اظہار کرنا تھا۔ ٹرمپ کی انتخابی مہم کے مشیر جیسن ملر نے بھی کل 'فوکس نیوز' سے گفتگو کرتے ہوئے الیکشن میں کسی تاخیر کے امکان یا تجویز کو مسترد کردیا اور کہا کہ صدر ٹرمپ خود بھی یہی چاہتے ہیں کہ انتخابات طے شدہ نظام الاوقات کے مطابق تین نومبر کو ہی ہوں۔

مارک میڈوز کا بھی یہ کہنا تھا کہ صدر ٹرمپ کا ایک سوال یہ بھی ہے کہ اگر انتخابات میں 100 فی صد ووٹ ڈاک سے ڈالے گئے تو کیا انتخابات کے نتائج تین نومبر کو ہی سامنے آپائیں گے۔ مارک میڈوز کے بقول ان کا تو خیال ہے کہ اس صورت میں انتخابات کے نتائج کا اعلان یکم جنوری تک بھی نہیں ہو پائے گا۔