ٹرمپ کے پاس بھیجا گیا زہر کا لفافہ، وائٹ ہاؤس پہنچنے سے پہلے ضبط کر لیا گیا

جس زہر کو صدر ٹرمپ کے پاس بھیجنے کی کوشش کی گئی وہ انتہائی خطرناک مادہ ہے جو ارنڈی کی پھلیوں سے حاصل کیا جاتا ہے، اسے دہشت گرد حملوں میں استعمال کیا جاتا رہا ہے۔ انسان اس زہر کی وجہ سے مر بھی سکتا ہے

تصویر سوشل میڈیا
تصویر سوشل میڈیا
user

قومی آوازبیورو

واشنگٹن: امریکی صدر ڈونلڈ ٹرمپ کو بھیجے گئے ایک مشکوک لفافہ کے زہر آلود ہونے کی تصدیق ہوئی ہے۔ قانون نافذ کرنے والے عہدیداروں نے ہفتے کے شروع میں ایک پیکٹ کی جانچ کی جس میں رسین نامی زہر موجود تھا۔

امریکی حکام نے اتوار کے روز بتایا کہ ’رسین‘ نامی ایک مہلک زہر کو لفافوں میں وہائٹ ​​ہاؤس کے پتہ پر بھیجا گیا تھا۔ پولیس حکام کے مطابق پیکٹوں کی چھنٹائی کے دوران مشکوک پائے گئے ان لفافوں کی جانچ پڑتال کی گئی جو اس ہفتے کے شروع میں وہائٹ ​​ہاؤس آئے تھے۔ تفتیش میں لفافے میں رسن کی نشاندہی ہوئی ہے۔


تفتیش کاروں کا خیال ہے کہ لفافہ کینیڈا سے بھیجا گیا ہے اور ایک مشکوک خاتون کی شناخت ہوگئی ہے۔ تفتیش کار یہ معلوم کرنے کی کوشش کر رہے ہیں کہ آیا اس طرح کے اور بھی لفافے بھی بھیجے گئے ہیں۔

امریکی حکام کے مطابق اگر کوئی خط یا پارسل وائٹ ہاؤس تک پہنچتا ہے تو صدر تک پہنچنے سے قبل اس کی مکمل جانچ کی جاتی ہے اور مشکوک پارسل کو علیحدہ کر لیا جاتا ہے۔ تفتیشی عہدیداروں نے رسین کو ایک انتہائی مہلک زہر قرار دیا ہے۔

رسین ایک انتہائی مہلک مادہ ہے جسے کاسٹر بینس (ارنڈی کی پھلیوں) سے نکالا جاتا ہے۔ اسے دہشت گرد حملوں میں استعمال کیا جاتا رہا ہے۔ انسان اس زہر کی وجہ سے مر بھی سکتا ہے۔ اس کا استعمال پاؤڈر، گولی یا تیزاب کے طور پر کیا جا سکتا ہے۔ اگر یہ زہر کسی شخص کے جسم میں داخل ہو جائے تو معدہ اور آنتوں میں جلن کے علاوہ یہ اندرونی خون کے بہنے کا بھی سبب بنتا ہے۔ اس کی وجہ سے وہ شخص بھی مر سکتا ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔