پاکستان خود کو نہیں سنبھال پا رہا تو کشمیر کیا سنبھالے گا: شاہد آفریدی

پاکستان کے سابق کرکٹر شاہد آفریدی نے پاکستان اور کشمیر کے تعلق سے ایک ایسا بیان دیا ہے جسے سن کر کئی پاکستانی ان کے خلاف کھڑے ہو جائیں گے۔ دراصل سوشل میڈیا پر شاہد آفریدی کا ایک ویڈیو وائرل ہو رہا ہے جس میں وہ پاکستان کی بدتر حالت کی طرف اشارہ کر رہے ہیں اور یہ کہتے ہوئے سنائی دے رہے ہیں کہ ’’پاکستان سے اپنے 4 صوبے نہیں سنبھل رہے، ایسے میں وہ کشمیر کو کیا سنبھالیں گے۔‘‘ آفریدی کا یہ بیان پاکستانی وزیر اعظم عمران خان کے لیے ایک مشورہ تصور کیا جا رہا ہے کیونکہ وہ بھی کشمیر میں امن کی بات کرتے ہیں، لیکن اس تعلق سے ابھی تک کوئی مثبت قدم نہیں اٹھایا ہے۔

ویڈیو میں شاہد آفریدی انسانیت پر ہو رہے مظالم کی طرف اشارہ کرتے ہوئے نظر آ رہے ہیں اور وہ یہ بھی کہتے ہیں کہ کشمیر کو ایک علیحدہ ملک بنا دیا جانا چاہیے تاکہ ہندوستان اور پاکستان میں کسی طرح کا جھگڑا نہ ہو۔ ان کا کہنا ہے کہ ’’کشمیر پاکستان کو نہیں چاہیے، اور یہ ہندوستان کو بھی مت دو۔ کشمیر کو ایک علیحدہ ملک بنا دیا جانا چاہیے، کیونکہ اس سے کم از کم انسانیت تو زندہ رہے گی۔ جو لوگ کشمیر میں مر رہے ہیں کم سے کم ان کی زندگیاں تو بچ جائیں گی۔‘‘

شاہد آفریدی کا یہ ویڈیو غالباً لندن کا ہے جہاں وہ ایک پریس کانفرنس سے خطاب کر رہے ہیں۔ انھوں نے اس دوران میڈیا سے یہ بھی کہا کہ کشمیر میں امن بحال کرنے کی کوششیں ہونی چاہئیں اور اس کے لیے ضروری ہے کہ ہندوستان و پاکستان کے بیچ کشمیر کا جھگڑا ختم ہو۔ وہ کہتے ہیں کہ ’’انسانیت بڑی چیز ہے۔ کشمیر میں جو لوگ مر رہے ہیں وہ کسی بھی مذہب کے کیوں نہ ہوں، انھیں مرتا دیکھ کر تکلیف ہوتی ہے۔‘‘