کورونا وائرس سے مرنے والوں کی تعداد 27 ہزار سےتجاوز

کورونا وائرس کا قہررکنے کا نام ہی نہیں لے رہا ہےاوراب پوری دنیا میں کورونا وائرس کے متاثرین کی تعداد پانچ لاکھ 96 ہزار سےزیادہ ہو گئی ہے جبکہ ہلاکتوں کی تعداد 27 ہزار سے زیادہ ہو گئی ہے۔ واضح رہے اس بیماری سے صحت یاب ہونے والوں کی تعداد تقریباً ایک لاکھ 30 ہزار ہے۔

چین سےشروع وہانے والے اس وبائی وائرس سے اب سب سے زیادہ مریض امریکہ میں ہیں جہاں یہ تعداد چین سے بھی بہت آگے پہنچ گئی ہے۔امریکہ میں اس وائرس سے متاثرہ افراد کی تعداد ایک لاکھ سے زیادہ ہو چکی ہے ۔ امریکہ میں کورونا سے 1500 سے زائد افراد ہلاک ہو چکے ہیں۔

برطانوی وزیراعظم بورس جانسن، ان کے ہیلتھ سیکریٹری اور وزیر صحت بھی اب شہزادہ چارلس کے بعد اس وائرس کا شکارہوگئے ہیں۔ادھر ملیشیا کے شاہی گھرانے میں بھی یہ مرض پہنچ چکا ہے۔ اٹلی میں کورونا وائرس سے سب سے زیادہ اموات ہوئی ہیں جہاں وائرس سے 9134 ہلاکتوں کی تصدیق کی جا چکی ہے۔

چین نے عارضی طور پر غیر ملکیوں کے ملک میں داخلے پر پابندی کا اعلان کیا ہے۔چین کے صدر شی جن پنگ اور امریکی صدر ڈونلڈ ٹرمپ کے درمیان بات چیت ہوئی ہے جس میں دونوں رہنماؤں نے کورونا وائرس سے درپیش خطرات کے متعلق تبادلہ خیال کیا ہے۔

آسٹریلیا کے وزیر اعظم نے کہا ہے کہ دوسرے ممالک سے آنے والے شہریوں کو ہوٹل میں قرنطیہ کیا جائے گا جبکہ انڈیا کی حکومت نے تقریباً 23 ارب کے امدادی پیکیج کا اعلان کیا ہے۔دنیا میں ایک چوتھائی ممالک میں لاک ڈاؤن نافذ ہوچکا ہے جس میں کئی حکومتوں نے تمام کاروبار بند اور صرف ضروری اشیا کی دکانیں کھلی رکھنے کا حکم دیا ہے۔