ماں نے اپنے ہی بیٹے کا کیا قتل، پولس نے کیا گرفتار

شیری رینی ٹیلناس کی عمر 45 برس ہے اور اُسے پولس نے سان فرانسسکو شہر کے جنوب میں پورٹے ول نامی گاؤں سے حراست میں لیا ہے۔ اس عورت پر الزام عائد کیا گیا ہے کہ اس نے اپنے 12 سالہ بیٹے کے ساتھ 7 سالہ بیٹے جیکسن ٹیلناس کو بھی نہر میں پھینک دیا تھا۔

کیلیفورنیا کے حکام کے مطابق نواحی علاقوں کے انتظامی اہلکار کے نائبین کو ایک زرعی نہر کے کنارے سے دو بے ہوش بچے ملے، جنہیں فوری طور پر اسپتال پہنچایا گیا۔ ہسپتال حکام نے ان میں سے بارہ سالہ لڑکے کی موت کی تصدیق کر دی اور پوسٹ مارٹم کے مطابق اس کی ہلاکت پانی میں ڈوبنے سے ہوئی ہے۔ ہلاک ہونے والے بچے کے 7 سالہ بھائی کو اسپتال حکام نے ہنگامی طبی امداد کے تحت بچا لیا ہے۔

بچ جانے والا بچہ پولس کی نگرانی میں ہے اور اُس کا علاج جاری ہے۔ سات سالہ بچے کی جسمانی حالت کے بارے میں پولس یا اسپتال حکام نے کوئی تفصیل نہیں بتائی ہے۔ اس سارے معاملے کی چھان بین ابھی جاری ہے۔

یہ امر باعث افسوس ہے کہ شیری رینی ڈوب کر مرنے والے بچے کو گیارہ برس قبل بھی ڈبو کر مارنے کی کوشش کر چکی ہے۔ اسی جرم کے تحت مونٹانا میں اُس پر مقدمہ بھی چلایا گیا تھا۔

ٹیلناس فیملی ایک برس قبل ہی پورٹے ول کے گاؤں منتقل ہوئی تھی۔ اس باعث گاؤں کے لوگ اُن کے بارے میں زیادہ نہیں جانتے۔ شیری رینی ٹیلناس کو گاؤں کے کسی فرد کی جانب سے پولس کو اطلاع دینے کے بعد گرفتار کیا گیا۔ فون پر پولس کو بتایا گیا کہ اس نے شیری رینی کو پراسرار انداز میں اپنے دو بچوں کو مکئی کے کھیت میں زبردستی لے جاتے ہوئے دیکھا ہے۔

امریکی ریاست مونٹانا کی منرل کاؤنٹی کی عدالت میں سن 2008 میں اپنے بیٹے کو ڈبونے کی کوشش کرنے کے مقدمے میں شیری رینی نے بتایا تھا کہ اُسے برے خیالات کے علاوہ عجیب و غریب آوازیں سنائی دیتی تھیں کہ بچے کو مار دو اور اُس نے انہی کے اثرات میں ایسا کیا تھا۔